ShQO ózenderinde muzdy usaqtaý jumystary júrgizilýde
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar men jergilikti atqarýshy organ ókilderi kún saıyn ózenderdegi jaǵdaıǵa monıtorıng júrgizedi.
Sınoptıkterdiń aıtýynsha, aldaǵy ýaqytta Óskemende aýa temperatýrasy joǵarylaıdy. Demek sý deńgeıi kóteriledi.
«Kúrshim aýdany Maraldy aýylyndaǵy Kúrshim ózeninde jáne Boran aýylyndaǵy Qara Ertis ózeninde 9600 sharshy metr alańda muz usaqtaldy. Osynyń nátıjesinde, muz keptelisi bolmaıdy. Boljam boıynsha sý tasqyny naýryzdyń aıaǵynda nemese sáýirdiń basynda bastalady. Atqarylyp jatqan sharalar sý tasqynynyń aldyn alýǵa baǵyttalǵan», - dedi oblystyq TJD bastyǵynyń orynbasary Dmıtrıı Tıtov.
Atalǵan eki ózendegi muzdyń ortasha qalyńdyǵy 60-100 santımetr. Oblystyń sý aıdyndaryndaǵy osy jumystar birneshe kún boıy jalǵaspaq.
