ShQO órt sóndirýshileri kúnine 15-20 ret shaqyrtýǵa shyǵady
ÓSKEMEN. QazAqparat – Oblystyq TJD órt sóndirýshilerge shaqyrtý jıilegenin málimdedi. Osy aıdyń basynan bergi ýaqyttyń ózinde 111 órt shyqqan, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órt qaýpi joǵary kezeń bastalǵaly beri óńir qutqarýshylary kún saıyn 15-20 ret qyzyl jalyndy aýyzdyqtaýǵa shyǵady.
Sáýir aıynyń basynan beri dalada 111 órt bolǵan. Tilsiz jaýdy sóndirýge 145,5 tonna sý jumsaldy. Kóp jaǵdaıda órttiń shyǵýyna halyqtyń otty abaısyz qoldanýy sebep bolyp otyr. Kóbinese dalada káýáp pisirýdiń sońy órtke ulasyp jatatyndyqtan, departament ókilderi saqtyq sharalaryn eske salady.
«Zań boıynsha ashyq aýada káýáp pisirýge tyıym joq. Biraq muny órt qaýipsizdigi erejelerine sáıkes jasaý kerek. Birinshiden, mangal úıler men ǵımarattardan keminde 10 metr qashyqtyqqa qoıylýy tıis. Benzındi nemese basqa janǵysh suıyqtyqty paıdalanýǵa qatań tyıym salynady. Qatty jel kezinde ot jaqpaǵan abzal. Árkez mangaldaǵy otty baqylap, jaqyn mańǵa qajet bolǵan jaǵdaıda sý daıyndap qoıyńyz. Demalys sońynda otty sóndirip, mangaldy qaqpaqpen jabyńyz», - deıdi órt sóndirýshiler.
Esterińizge sala ketsek, osyǵan deıin ShQO-da 5 ga aýmaqta dalaly alqap janyp ketkenin habarlaǵan edik.
