ShQO ormanshylarynda órt sóndirýge arnalǵan jabdyqtar men baılanys quraldary joq
Bul týraly oblys ákimi Ermek Kósherbaevtyń Rıdder men Cheremshanka orman sharýashylyǵy qyzmetkerlerimen kezdesýi barysynda aıtyldy.
«Ókinishke qaraı, ormanshylardyń materıaldyq-tehnıkalyq qamtamasyz etilýi máselesi ózekti bolyp otyr. Ormanshylarda órt sóndirýge arnalǵan jabdyqtar, baılanys quraldary jáne órt oshaqtaryn anyqtaýǵa arnalǵan jabdyqtar joq. Arnaıy dıalog kezinde orman sharýashylyǵy mamandarynyń barlyq usynysy nazarǵa alyndy. Endi biz ony júıelep, Úkimetke joldaımyz», - deıdi aımaq basshysy.
Onyń aıtýynsha, Shyǵys Qazaqstanda elimizdegi ormandardyń jartysynan astamy shoǵyrlanǵan.
«Sondyqtan birinshi kezekte orman órtterin anyqtaý jáne aldyn alý, brakonerlermen jáne zańsyz aǵash kesetindermen kúresý, eń bastysy, aýyl turǵyndaryn órtten qorǵaý úshin barlyǵyn jasaý qajet. Sondaı-aq ormanshy mamandyǵynyń bedelin kóterý kerek», - deıdi Ermek Kósherbaev.
Eske salsaq, búgin Shyǵys Qazaqstan oblysy Katonqaraǵaı aýdanynda orman órtiniń taralýy toqtatylǵan bolatyn.