ShQO ormandarynda jyl basynan beri 67 órt shyqty
ÓSKEMEN. QazAqparat – Shyǵys Qazaqstan oblysyndaǵy ormandarda jyl basynan beri 67 órt shyqty, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, óńirde órt qaýpi joǵary kezeń bastalǵaly beri qutqarýshylar kúsheıtilgen rejımde jumys isteýde. Olar kún saıyn 15-20 ret órt sóndirýge attanady.
«Kóp jaǵdaıda ystyq aýa raıy men adamdardyń abaısyzdyǵy ot shyǵýyna sebep bolyp jatady. Jyl basynan beri oblys ormandarynda 67 órt shyqty. Shyǵys Qazaqstanda órt qaýipsizdigin qamtamasyz etý maqsatynda azamattyq qorǵaý kúshteri, polıtseıler, ormanshylar men jergilikti atqarýshy organ ókilderiniń qatarynan 46 mobıldi top qurylǵan», - delingen aqparatta.
Qazirgi ýaqytta olardyń qatarynda 270 adam bar. Bıyl 696 reıd ótkizildi.
«Eldi mekenderdi órtten qorǵaý úshin TJD qyzmetkerleri órt qaýipsizdigin qamtamasyz etýdiń negizgi talaptarynyń saqtalýyn muqııat qadaǵalaıdy. Osy rette, ormandarda, aýyldarda jáne saıajaı ýchaskeleriniń irgelerinde jer jyrtýdyń mańyzy zor. Jer jyrtý úshin topyraqty aýdaratyn býldozerler men traktorlar qoldanylady. Sonyń nátıjesinde órttiń taralýyna jol bermeıtin jolaq paıda bolady», - delingen habarlamada.
