ShQO ormandarynda jaz shyqqaly beri 30-ǵa jýyq órt tirkelgen
ÓSKEMEN. KAZINFORM — Shyǵys Qazaqstan oblysynda jaz shyqqaly beri 29 ret órt tutandy.
ShQO tótenshe jaǵdaılar departamenti baspasóz qyzmetiniń málimetine súıensek, búginde óńir boıynsha órt qaýpiniń joǵary deńgeıi áli saqtalyp otyr.
— Órt qaýpi joǵary maýsym bastalǵaly beri oblys boıynsha 29 orman órti tirkeldi. Tabıǵı órtterdiń aldyn alý maqsatynda Shyǵys Qazaqstanda 48 mobıldi top jumys istep jatyr. Departament bólimsheleri polıtsııa qyzmetkerlerimen jáne jergilikti atqarýshy organdar ókilderimen birlesip, osy kúnge deıin 620-ǵa jýyq profılaktıkalyq reıd ótkizdi, — delingen aqparatta.
Mobıldi toptar aýmaqtardy patrýldep, turǵyndar arasynda túsindirý jumystaryn júrgizip jatyr.
Sondaı-aq órt qaýipsizdigi talaptarynyń saqtalýyn baqylap, qurǵaq ósimdikterdi zańsyz órteý derekterin anyqtaýǵa kiristi. Reıdterdiń nátıjesinde 174 adam ákimshilik jaýapkershilikke tartyldy.
Eske salsaq, osyǵan deıin ShQO-da jer úıden shyqqan órtten erli-zaıypty kóz jumǵany habarlanǵan.
