ShQO ormandarynda órtti erte anyqtaý júıesi ornatylady
ÓSKEMEN. KAZINFORM – Shyǵys Qazaqstan oblysyndaǵy ormandarǵa alǵash ret órtti erte anyqtaý júıesi ornatylmaq.
Jabdyqtar antennalyq-dińgekti qurylymdar túrinde bolady. Sol arqyly orman aýmaǵyndaǵy órt oshaqtaryn jedel anyqtaýǵa múmkindik jasalmaq.
- Órtti erte anyqtaý júıeleri oblystaǵy toǵyz orman sharýashylyǵynda ornatylady. Barlyǵy 90 antennalyq-dińgekti qurylym qoıylady. Olar tútin shyqqan jerdi anyqtap, aqparatty ortalyq dıspetcherlik pýnktke jiberedi. Mundaı dińgekter bizge asa qajet, sebebi óńirdiń jer bederi taýly bolǵandyqtan órtti der kezinde anyqtaý árdaıym múmkin bola bermeıdi, - deıdi ShQO Tabıǵı resýrstar jáne tabıǵat paıdalanýdy retteý basqarmasynyń basshysy Murat Qusaıynov.
Mundaı jabdyqtar Shyǵys Qazaqstanda alǵash ret ornatylady. Buǵan deıin Býrabaıda, Abaı jáne Pavlodar oblystarynda iske qosylǵan.
- Maýsym men shilde aılarynda dińgekter Ulan jáne Samar aýdandarynda ornatylady. Qalǵan qurylymdardy bıyl jyldyń sońyna deıin jáne kelesi jyly kezeń-kezeńimen ornalastyrý josparlanǵan, - deıdi M.Qusaıynov.
Eske salsaq, osyǵan deıin ShQO ormandarynda órt qaýpiniń eń joǵary deńgeıi jarııalanǵany habarlanǵan.
