ShQO ormandarynda órt qaýpiniń eń joǵary deńgeıi jarııalandy
ÓSKEMEN. KAZINFORM - Shyǵys Qazaqstan oblysynda órt qaýpiniń eń joǵary, besinshi klasy tirkeldi. Aptap ystyq pen jaýyn-shashynnyń bolmaýyna baılanysty sońǵy bir apta ishinde óńir ormandarynda 4 ret órt shyqty.
Qazir Rıdder qalasyndaǵy Batys Altaı memlekettik tabıǵı qoryǵy aýmaǵyndaǵy órt áli sóndirilip jatyr. Buǵan deıin órt oshaqtary Óskemen, Samar ormanshylyqtarynda jáne Buqtyrma sý qoımasynyń jaǵalaýynda tirkelgen bolatyn.
- Aýmaǵy jaǵynan bul asa iri órtter emes. Tórt órttiń ishindegi eń aýqymdysy Buqtyrmadaǵy «Aıýda» demalys bazasynyń mańynda boldy, onyń kólemi 13 gektar boldy. Degenmen jedel áreket etýdiń arqasynda qyzyl jalyn aýyzdyqtaldy. Bizdiń basty mindetimiz - iri kólemdegi orman órtterine jol bermeý. Al qazirgi aýa raıy jaǵdaıyna baılanysty shaǵyn órtter áli de shyǵyp jatyr, - dedi ShQO Tabıǵı resýrstar jáne tabıǵat paıdalanýdy retteý basqarmasynyń basshysy Murat Qusaıynov.
Óńirde úsh aptaǵa jýyq ýaqyt boıy jaýyn-shashynsyz ystyq aýa raıy saqtalyp tur. Sonyń saldarynan órt shyǵý qaýpi joǵary kúıinde qalyp otyr.
- Kún ysyp keledi. Orman sharýashylyǵy jáne janýarlar dúnıesi komıteti órt jaǵdaıynyń odan ári kúrdelene túsetinin eskertip otyr. Órt qaýpi deńgeıiniń artýy boljanady, - dedi ShQO Orman sharýashylyǵy jáne janýarlar dúnıesi aýmaqtyq ınspektsııasynyń basshysy Qaırat Meırambekov.
Órt qaýpi maýsymy bastalǵaly beri oblys aýmaǵynda 15 orman jáne 38 dala órti tirkelgen. Onyń ishinde 10 órt orman sharýashylyqtary aýmaǵynda, taǵy beseýi erekshe qorǵalatyn tabıǵı aýmaqtarda bolǵan.
- Qazirgi tańda aýa raıy óte ystyq. Boljam boıynsha, shilde aıy da asa ystyq bolady, keı jerlerde aýa temperatýrasy 50 gradýsqa deıin kóterilýi múmkin. Barlyq bólimshe táýlik boıy jumys istep jatyr, qajetti kúshter men quraldar jetkilikti, - dedi ShQO Tótenshe jaǵdaılar departamenti bastyǵynyń orynbasary Farhat Ámre.
Eske salsaq, osyǵan deıin Reseıde bir aptada 600-ge jýyq orman órti tirkelgeni habarlanǵan.
