ShQO Onkologııa jáne hırýrgııa ortalyǵynda aýqymdy jóndeý jumystary júrgizilýde
ÓSKEMEN. QazAqparat – Aımaq basshysy Danıal Ahmetov Shyǵys Qazaqstan oblysyndaǵy Onkologııa jáne hırýrgııa ortalyǵyndaǵy jóndeý jumystarynyń jaı-kúıin tekserdi, dep habarlaıdy QazAqparat tilshisi.
Danıal Ahmetov ShQO Onkologııa jáne hırýrgııa ortalyǵyndaǵy jóndeý jumystarynyń barysyn, operatsııalyq blokty, reanımatsııa, mammologııa jáne gınekologııa bólimshelerin qarap shyqty. Rekonstrýktsııalaý jumystaryn osy jyldyń naýryz aıynyń sońyna deıin aıaqtaý josparlanyp otyr.
Búginde atalǵan ortalyqtyń ekinshi korpýsy jóndelýde. Operatsııalyq jáne ortalyq zararsyzdandyrý bólimshesi birinshi qabattan besinshi qabatqa aýystyrylǵan. Onkologııalyq aýrýlardy barynsha dál dıagnostıkalaýǵa múmkindik beretin zamanaýı jabdyq satyp alyndy. Sondaı-aq qazirgi ýaqytta bir tehnologııalyq bazany paıdalana otyryp, qashyqtan sáýlelik terapııa men radıohırýrgııalyq aralasýlardyń barlyq túrlerin júrgizetin jelilik údetkishti ornatý boıynsha daıyndyq jumystary júrgizilýde.
«Qurylys jumystary jaqsy júrip jatyr. Tek qabyrǵa panelderin qaıta jóndeý kerek. Olar ádette eshqandaı dybys shyǵarmaı, sapaly salynýy tıis. Medıtsınalyq birtekti lınoleým da dál sondaı bolýy qajet. Naýryz aıynyń sońynda osynda taǵy bir kelip tekseremin, - dedi Danıal Ahmetov.
Aıta keteıik, óńirdi damytýdyń keshendi baǵdarlamasy aıasynda Óskemendegi onkologııalyq ortalyqtyń 37 mamany álemniń úzdik onkologııalyq klınıkalarynda, atap aıtqanda: Ulybrıtanııa, Frantsııa, Italııa, Izraıl, Túrkııada biliktiligin arttyrdy.
