ShQO óńiriniń ańyzdary men ertegileri bir kitapqa jınaqtaldy
Atalmysh kitapta oblystaǵy 15 kıeli oryn jaıly ańyzdar jınaqtalypty: Ertis ózeni, Qıyn Kerish shatqaly, Marqakól kóli, Rahman qaınarlary, Muztaý, Qońyr Áýlıe, Qasıetti bulaq, Yrǵyzbaı ata kesenesi, Berel qorǵandary, Shilikti qorymy, Eńlik-Kebek kesenesi, Qozy Kórpesh-Baıan Sulý mazary, Kúshikbaı, Ablaıkıt bekinisi, Aqbaýyr. Ańyz-ertegi túrinde jazylǵan týyndy balalar aýdıtorııasyna arnalǵan eken.
Oblystyń ańyzdary men ertegileri negizinde kitap shyǵarý ıdeıasy ótken jyly paıda bolǵan. Mundaǵy negizgi maqsat - óńirdiń qasıetti oryndaryn keńinen nasıhattaý, jas urpaqty óz ólkesiniń tarıhyn bilýge baýlý arqyly kórkem ádebıet oqýǵa qyzyǵýshylyǵyn arttyrý. Al onyń elektrondy nusqada shyǵarylýy basylymdy barynsha qoljetimdi etýge baǵyttalǵan eken.
Kitapta basty eki keıipker bar: Sanjar esimdi bala men onyń atasy. Ekeýi Shyǵys Qazaqstandy aralap, saıahatqa shyǵady. Olardyń júrip ótken joldary kitaptyń bas betterindegi kartada kórsetilgen. Ár ańyz-ertegige «Daryn» ortalyǵynyń, Óskemen qalasynyń balalar kórkemóner mektebiniń jáne oqýshylar shyǵarmashylyq saraıynyń sýret baıqaýlaryndaǵy jeńimpazdardyń sýretteri arqyly ıllıýstratsııa jasalǵan. Kitap muqabasy Berel qorymynda tabylǵan artefaktilerdiń negizinde jasalǵan oıý-órnektermen kórkemdelip, uzyn aq saqaldy qarııa beılenegen. Ol ótken zamanmen men osy kúndi baılanystyryp, oqyrmandarǵa sol aralyqta jınaqtalǵan danalyqty jetkizip otyrǵandaı. Sonymen qatar, munda oblys aýmaǵyn mekendeıtin túrli halyqtardyń maqal-mátelderi de qoldanylǵan.
«Biz ázirshe el aýzyndaǵy 15 kıeli oryndy ǵana berip otyrmyz. Biraq bul jobanyń tek bastamasy ǵana. Aldaǵy ýaqytta toptamany tolyqtyrýdy josparlap otyrmyz - dedi Týrızm jáne syrtqy baılanystar basqarmasynyń basshysy Jasulan Sársebaev.
Atalmysh basylym týrızm basqarmasynyń toureast.kz resmı saıtynda jarııalanyp, kez kelgen oqyrmanǵa qoljetimdi bolmaq.
