ShQO óner adamdary jańa mádenıet nysandarynyń salynýyn qoldaıdy
ÓSKEMEN. KAZINFORM – Memleket basshysy Qasym-Jomart Toqaev Qazaqstan halqyna Joldaýynda «Halyqtyq qurylys» jylyna oraı óńirlerde áleýmettik nysandar salýǵa basymdyq berdi. Josparǵa sáıkes, 70-ke jýyq densaýlyq saqtaý nysany boı kóterip, bilim berý, sport jáne mádenıet salalaryndaǵy 50-ge jýyq mekemeniń qurylysy bastalady.
Atap aıtqanda, perzenthanalar, aýrýhanalar, jedel medıtsınalyq kómek kórsetý stantsııalary, balalarǵa arnalǵan ońaltý ortalyqtary men erekshe qajettilikteri bar balalarǵa arnalǵan sport zaldary salynady. Sonymen qatar mádenıet salasyn damytýǵa da kóńil bólinbek.
Bul jańalyq óner adamdarynyń kóńilinen shyqty. Ásirese, mádenıet úıleriniń salynýy shyǵarmashylyq qaýym úshin mańyzdy. Óıtkeni mádenıet oshaqtary — ulttyq ónerdi nasıhattap, jas talanttardy tárbıeleıtin rýhanı ortalyqtar.
Shyǵys Qazaqstan oblysynda da teatr óneri men mádenıettiń ózindik orny bar. Óskemen qalasyndaǵy Shyǵys Qazaqstan oblystyq drama teatry óńirdiń mádenı ómirine úles qosyp, kórermenge rýhanı tárbıe berip keledi. Teatr sahnasynda qoıylatyn qoıylymdar halyqtyń ónerge degen qyzyǵýshylyǵyn arttyryp, ulttyq jáne álemdik dramatýrgııa úlgilerin nasıhattaýǵa múmkindik beredi.
«Eren eńbegi úshin» medaliniń ıegeri, ánshi Arnıka Baıbosynovanyń aıtýynsha, mádenıet nysandarynyń kóbeıýi óner adamdaryna da, kórermenderge de jańa múmkindikter ashady.
— Biz, óner adamdary, mádenıet úıleriniń salyna bastaıtynyna erekshe qýanamyz. Mádenıet oshaqtary — ónerdiń damýyna, jas talanttardyń tanylýyna jol ashatyn mańyzdy oryndar. Teatrlar men mádenıet úıleri halyqtyń rýhanı suranysyn qanaǵattandyryp qana qoımaı, ulttyq qundylyqtarymyzdy dáripteýge de yqpal etedi. Sondyqtan óńirlerde mádenıet nysandarynyń kóbeıgeni ónerdiń órkendeýine serpin beredi dep senemin, — dedi Arnıka Baıbosynova.
Mádenıet mekemeleriniń damýy — óńirlerdiń rýhanı áleýetin arttyrýǵa baǵyttalǵan mańyzdy qadam. Jańa mádenıet úıleri men qoldanystaǵy teatrlardyń qyzmeti shyǵarmashylyq kezdesýler ótkizýge, jas talanttardy qoldaýǵa jáne ónerdi halyqqa jaqyndatýǵa múmkindik beredi.
