ShQO oqýshylary qashyqtan qalaı bilim alyp jatyr
Elimizde Tótenshe jaǵdaı kezinde oqýshylarǵa ınternet jáne teledıdar arqyly sabaq ótkizýdiń 2 túri uıymdastyrylǵan bolatyn. Birinshi baǵyt Kundelik.kz, Bilimland.kz jáne Daryn.online.kz ınternet-platformalary arqyly júzege asyrylýda. Osy formatta Shyǵys Qazaqstandaǵy 248 eldi mekende 430 mekteptiń 172 437 oqýshysy (91,5%) oqyp jatyr. Ekinshi baǵyt – telesabaqtar. Internet jyldamdyǵy tómen 218 eldi mekende turatyn 15 841 oqýshy (8,5%) El Arna, Balapan jáne Qazaqstan telearnalary arqyly bilim alýda.
«Qazirgi ýaqytta muǵalimderdiń de jumysy kóbeıip, ata-analardyń ustaz eńbegine degen kózqarastary ózgerdi. Sondyqtan oqýshylar men ata-analar da túsinistikpen qarap, óz úlesterin qosýy qajet dep oılaımyn. Syn saǵatta olar birlese áreket etken jaǵdaıda qashyqtan oqytýdyń nátıjesi oń bolady», - deıdi ShQO bilim basqarmasy «Shyǵys» ádistemelik ortalyǵynyń dırektory Muńlyq Asanova.
Onyń aıtýynsha, muǵalimderge ádistemelik qoldaý kórsetý maqsatynda áleýmettik jeliler arqyly ınternet platformalarda jumys isteýdiń algorıtmi usynylyp, «Oqýshymen keri baılanysty qalaı ornatasyń?», «Oqý materıaldaryn qalaı ázirleısiń?», «Qandaı tsıfrlyq platformalardy qoldanasyń?» syndy taqyryptarda semınarlar uıymdastyrylǵan. Qashyqtan oqytýdyń ekinshi aptasynan bastap aımaqtaǵy 2000-ǵa jýyq muǵalimniń is-tájirıbeleri zerdelenip, ár pán boıynsha 1700 sabaqtyń jospary jasaldy.
«Internet-platformalarmen jumys isteý tájirıbesi az 400 pedagog bilim berý uıymdary respýblıkalyq qaýymdastyǵynyń qysqa merzimdi vebınar kýrsynan ótýde. Qashyqtan oqytýdy sapaly uıymdastyrý maqsatynda oblysta jobalyq keńse qurylǵan. Bul oqytý protsesin úılestirip, tehnıkalyq qoldaýdy qamtamasyz etýge múmkindik beredi», - deıdi Muńlyq Asanova.