ShQO oqýshylary arasynda tsıfrlyq tehnologııadan chempıonat ótti

ÓSKEMEN. QazAqparat - Óskemende 3D modeldeý, robototehnıka, baǵdarlamalaý boıynsha oblystyq chempıonat ótti, dep habarlaıdy QazAqparat tilshisi.

«Skills for geeks» degen ataý alǵan baıqaý «Tsıfrlyq Qazaqstan» baǵdarlamasy aıasynda uıymdastyryldy. Birinshilikke qatysý úshin 2134 oqýshy ótinish bildirip, aýdandyq jáne qalalyq irikteý kezeńderine qatysqan bolatyn. Іrikteýden ótken 246 oqýshy oblystyq kezeńde baq synasty. Olardyń qatarynda «Aq nıet» múmkindigi shekteýli balalarǵa arnalǵan mektep-ınternattyń oqýshylary da bar.

Chempıonat barysynda balalar «PTC Creo Parametric 3.0», «Blender» syndy qıyn baǵdarlamalardyń sheshimin taýyp, «Sýmo» jáne «Kegelrıng» boıynsha ózara jarysty.

Jarystyń ótýine oblys ákimdigimen qosa, «Nur Otan» partııasynyń oblystyq fılıaly da muryndyq bolyp otyr.

«Bıylǵy oqý jylynda oblystaǵy 378 shaǵyn jıyntyqty mektepte ІT-synyptar ashyldy. Shilde aıyna deıin óńirdegi mektepterge 2869 jańa kompıýter men 500-ge jýyq ınteraktıvti taqta satyp alynady. Oǵan oblystyq bıýdjetten 899,4 mıllıon teńge qarastyrylǵan. Sondaı-aq ótken jyly óńir mektepteriniń 544 muǵalimi «ІT-tehnologııalar baǵdarlamasy» boıynsha qaıta daıarlaýdan ótti. Al bıyl 573 muǵalim dál osyndaı kýrsqa baryp, biliktilikterin shyńdap qaıtpaq» - deıdi oblys ákiminiń orynbasary Ásem Núsipova

Nátıjesinde «Baǵdarlamalaý» atalymynda «10+» jas aralyǵyndaǵy komandalar arasynda Óskemen quramasy jeńiske jetti. Al «14+» jas sanatynda oblystyq mamandandyrylǵan mekteptiń komandasy úzdikter qatarynan kórindi.

«3D modeldeý» atalymynda «10+» jas aralyǵyndaǵy komandalar arasynda Úrjar aýdanynyń quramasy jeńis tuǵyrynan kórinse, «14+» jas sanatynda semeılik oqýshylar birinshi oryndy jeńip aldy.

«Robot tehnıkasy» kategorııasynda «10+» jáne «14+» jas sanattarynda birinshi oryndy oblystyq mamandandyrylǵan mekteptiń quramasy ıelendi.

Al jalpykomandalyq esepte «10+» jas aralyǵyndaǵy komandalar arasynda oblystyq mamandandyrylǵan mekteptiń quramasy birinshi oryndy jeńip aldy. Ekinshi oryndy Semeı quramasy ınshiledi. Olarǵa 3D prınter tabystaldy. Úshinshi oryndy Abaı aýdanynyń quramasy ıelenip, noýtbýk aldy.

Al «14+» jas sanatynda jalpykomandalyq esepte Glýbokoe aýdanynyń quramasy jeńiske jetti. Ekinshi oryndy oblystyq mamandandyrylǵan mekteptiń quramasy ıelendi. Al úshinshi orynǵa semeılikter taban tiredi.