ShQO-nyń joǵary oqý oryndaryna túsý úshin 400 grant bólinedi
ÓSKEMEN. QazAqparat - 2017 jyly Shyǵys Qazaqstanda jergilikti bıýdjet qarjysy esebinen oblystyń 5 ýnıversıtetine 400 grant bólinedi, dep habarlaıdy QazAqparat tilshisi.
«Stýdentterdi oqytýǵa osynshama qomaqty qarjylyq resýrstardy quıa otyryp, biz JOO-larǵa basty shart qoıyp otyrmyz. Olar el arasynda kásibı baǵdarlaý jumystaryn belsendi jáne júıeli júrgizýi kerek. Memlekettik tapsyrysqa ıek artyp, passıvti pozıtsııa ustanýdy doǵarý qajet. Jańa suranysqa ıe mamandyqtardy engizbesek kóshten qalamyz» - dedi ShQO ákimi.
Granttardyń bólinýine sebep bolyp otyrǵan jaıt - shyǵysqazaqstandyq túlekterdiń oqýǵa sheteldik ýnıversıtetterge kóptep ketýi. ShQO bıligi bul máseleni keshendi túrde sheshý qajet dep sanaıdy. Sondyqtan, «Rýhanı jańǵyrý» baǵdarlamasy aıasynda «Bilikti maman» baǵdarlamasy ázirlendi.
«Árıne, biz túlekterimizdiń Anglııanyń, Frantsııanyń beldi joǵary oqý oryndarynda, ıaǵnı álemniń úzdik ýnıversıtetterinde oqýyn quptaımyz. Biraq, olardyń oqytý deńgeıi men sapasy qazaqstandyq shamadaǵy, tipti odan da tómen ýnıversıtetterden góri óz elinde jáne óz oblysynda oqyǵany durys bolar edi» - dedi D. Ahmetov.
