ShQO-nyń Zaısan aýdanynda shegirtkemen kúreske qarajat nelikten bólinbeıdi
ZAISAN. QazAqparat – Shyǵys Qazaqstan oblysynyń Zaısan aýdanyna qarasty Shilikti men Tasbastaý aýyldarynda shegirtke qaptap, jaıylym men baqshany otap jatyr, dep habarlaıdy QazAqparat altaynews.kz-ke silteme jasap.
Saıttyń jazýynsha, sharýalar shegirtkelermen kúrese almaı álek. Qaptaǵan zııankester jaıylymnyń túgin qaldyrmaı oıran etýde. Aýyl jurty tórt-túligi azyqsyz qalýy múmkindigin aıtyp, dabyl qaǵyp jatyr.
«Baqshaǵa da, shabyndyqqa da túsip jatyr. Áýeli adamǵa soqtyǵasady. Mashınanyń radıatorlaryna ushyp, biteıdi. Ábden mazamyzdy qashyrdy», – deıdi aýyl turǵyndary.
Al Zaısan aýdanynyń ákimdigi jándikterdi joıýǵa bıýdjetten qarajat nelikten bólinbeı otyrǵanyn túsindirdi.
«Aýyldarǵa baryp, bul jaǵdaıdy baqylap qaıttyq. Dárileý júrgizilgen joq. Sebebi, bular - jergilikti shegirtkeler. Úıirli de emes. Zııankestermen kúresti sharýa qojalyqtary óz qarajattary arqyly ǵana júrgize alady. Bir tekshe metrde 8 shegirtkeden asyp ketse ǵana qarajat bólinýi múmkin. Al ázirshe shegirtkeler aıtarlyqtaı kóp emes», – deıdi Zaısan aýdany aýyl-sharýashylyq jáne kásipkerlik bóliminiń jetekshisi Murathan Qııamazanov.
