ShQO-nyń Úrjar aýdanynda shegirtkemen kúres 31 myń gektar aımaqta júrgiziledi
ÚRJAR. QazAqparat - Bıyl Shyǵys Qazaqstan oblysy Úrjar aýdanynda shegirtkemen kúres 30 900 gektar jerge júrgiziletindigi týraly «QazAqparat» tilshisine Úrjar aýdandyq aýmaqtyq ınspektsııa basshysy Muratbek Bestibekov habarlady.
Bul jóninde aýdanǵa QR Aýyl sharýashylyǵy mınıstrliginiń agroónerkásip keshenindegi memlekettik ınspektsııasy komıtetiniń ShQO aýmaqtyq ınspektsııasynan arnaıy jumys toby kelip, bólim, mekeme basshylary jáne aýyl ákimderimen jıyn ótkizgen bolatyn.
«Bıyl óńirde 30 900 gektar jer zalalsyzdandyrylýy kerek. Bul maqsatqa respýblıkalyq bıýdjetten qarjy qarastyryldy. Jalpy aýdanymyzda asa qaýipti eki túrli shegirtke bar. Biri ıtalııalyq, ekinshisi azııalyq shegirtke. Bular Qazaqstanda óte keń taralǵan asa qaýipti zııankester. Hımııalyq óńdeý jumystary dernásilder qanattanǵanǵa deıin júrgizilse, tıimdiligi joǵary bolady. Bıylǵy jyly azııalyq shegirtkelerge qarsy hımııalyq óńdeý jumystary 11,5 myń ga jerge jáne ıtalııalyq prýsqa 19,4 myń ga jerge júrgiziledi dep josparlanýda. Búgingi kúni aýdan ákimi Serik Zaınýldınniń úkimimen shegirtkege qarsy aldyn alý sharalaryn júrgizetin arnaıy shtab quryldy», - deıdi Úrjar aýdandyq aýmaqtyq ınspektsııa basshysy Muratbek Bestibekov.
Eske sala keteıik, ótken jyly aýdanǵa qarasty Qaraqol, Sholpan, Taskesken aýyldarynyń egistik alqaptaryna shegirtkeler shabýyldaǵan bolatyn. Osyǵan oraı alqaptardy óńdeý jumystary bıylǵy jyly erte bastalmaq.
