ShQO-nyń Úrjar aýdanynda 12 bala A vırýsty gepatıtpen aýyrǵan

ASTANA. QazAqparat - Shyǵys Qazaqstan oblysy Úrjar aýdanynyń Sholpan aýylynda 2017 jyly jáne 2018 jyldyń ótken kezeńinde orta mektep oqýshylary arasynda gepatıtke qatysty 12 oqıǵa tirkelgen, onyń ishinde 11 oqýshy, 1 ekpe salynbaǵan bala aýyrǵan, dep habarlaıdy QazAqparat QR DSM Qoǵamdyq densaýlyq saqtaý komıtetine silteme jasap.

Statsıonarda em qabyldaǵan 49 naýqastyń 12-si A vırýstyq gepatıti dıagnozymen, qalǵan 37-si baýyr, ót joldary jáne basqa da aýrýlar dıagnozymen (ehınokokkoz, dıskınezııa jáne t. b.) emdelgen.

2017 jylǵy qyrkúıekten bastap aýrýǵa ártúrli synyptyń oqýshylary shaldyqqan. A vırýsty gepatıtine qarsy vaktsınaǵa 144 balaǵa salynýy tıis bolsa, 140 balaǵa ǵana ekpe egilgen, onyń ishinde 4 balanyń ata-anasy jazbasha túrde vaktsınatsııadan bas tartqan. Osy ata-analarmen birneshe ret áńgime júrgizildi, alaıda olar egilýge kelisim bermedi.

Osylaısha, aýyrǵandarmen qarym-qatynasta bolǵandarǵa apta saıynǵy medıtsınalyq baqylaý ornatyldy. Qosymsha apta saıyn quramynda pedıatr, ınfektsıonıst, epıdemıolog dárigeri bar aýdandyq mamandar brıgadasy aýylǵa bir baryp shyǵady. Sholpan aýylynda AVG tirkelýine baılanysty aýdannyń medıtsınalyq qyzmeti Úrjar aýdandyq qoǵamdyq densaýlyqty saqtaý basqarmasynyń mamandarymen birlesip, epıdemııaǵa qarsy jáne emdeý is-sharalaryn júrgizýde.

AVG barlyq oshaqtaryna epıdemıologııalyq tekserý jáne Sholpan aýylynyń dárigerlik ambýlatorııasyna, Júzaǵash orta mektebine jospardan tys tekserý júrgizildi. Observatsııalyq baqylaý merzimi 2018 jylǵy 12 aqpanǵa deıin uzartyldy.

Qazirgi ýaqytta mektepte aýyz sýdy jaramsyz dep tanyldy. Oqýshylar  bótelkedegi aýyz sýdy ishedi. Barlyq buqaralyq mádenı-sporttyq is-sharalar toqtatyldy jáne oqytýdyń kabınettik júıesi ornatyldy.

Sonymen qatar, mektepten jáne úılerden 62 aýyz sý synamasy alyndy. Mektepte, jeke úılerde zalalsyzdandyrý jumystary, mekteptiń sýmen jabdyqtaý júıesin jýý jáne dezınfektsııalaý, úılerdegi sý saqtaıtyn ydystardy dezınfektsııalaý júrgizildi. Qaıtalap synamalar alǵanda aýyz sýdan alynǵan nátıjesi teris boldy.

ShQO boıynsha Qoǵamdyq densaýlyq saqtaý departamentiniń mamandary kómek kórsetý jáne is-sharalardyń sapasyn baqylaý úshin Úrjar aýdanyna keldi.

2017 jyly Shyǵys Qazaqstan oblysynyń aýmaǵynda A vırýsty gepatıtine qatysty 75 oqıǵa tirkeldi. Sonda da statıstıka burynǵyǵa qaraǵanda sońǵy jyldary óńirde A vırýsty gepatıtine shaldyǵý tómendegeni baıqalǵanyn kórsetti.

Esterińizge sala keteıik, A gepatıti - A gepatıti vırýsynan týyndaıtyn baýyr aýrýy. Aýrýdy basqalarǵa naýqas adamnan juǵady. Infektsııa asqazan-ishek joldary arqyly taraıdy. Eń aldymen, aýyz sý, sondaı-aq tamaq ónimderi, kókónister men jemister arqyly juǵady.