ShQO-nyń Ulan aýdanynda orman órtimen kúres jalǵasyp jatyr

ÓSKEMEN. QazAqparat – Shyǵys Qazaqstan oblysy Ulan aýdanyndaǵy orman órti bir kúnnen keıin oqshaýlandy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, órt 26 maýsym kúni saǵat 17.30 shamasynda Ulan aýdany Asýbulaq orman sharýashylyǵyndaǵy Prımorsk ormanshylyǵynda shyqqan.

Tilsiz jaý shóp pen butalardy sharpydy. Órtti sóndirý úshin Shyǵys Qazaqstan oblysy avıatsııalyq bólimshesiniń MI-8 tikushaǵymen ormanshylar desanty jáne sý jetkizildi. Jartasty jer bolǵan soń jalynmen kúresý qıynǵa soqty.

«Arqaǵa aspaly órt sóndirgishti kóterip, jumys isteýge týra keldi. Onyń salmaǵy shamamen 20 keli. Oǵan qosa tútin aýa jutqyzbaıdy. Qutqarýshylar men ormanshylar óz ómirlerin únemi qaterge tigip, osylaı jartastan jartasqa sekirip, bar kúshin salady. Olardyń birlesken is-qımylynyń arqasynda órt oqshaýlandy», - deıdi oblystyq TJD órt sóndirý qyzmeti bastyǵynyń orynbasary Bolat Nurdybaev.

27 maýsym kúni saǵat 16.00-de ottyń beti qaıtty. Alaıda, qyzyl jalyn tolyq óshirilgenge deıin TJD órt sóndirýshileri jáne ormanshylardan 55 adam men 8 tehnıka sol jerde jumys isteıdi.