ShQO-nyń Shemonaıha qalasynda 39 kósheniń ataýy ózgeredi
ÓSKEMEN. QazAqparat - Jyl aıaǵyna deıin Shyǵys Qazaqstannyń Shemonaıha qalasynda 39 kósheniń ataýy zaman talabyna saı ózgeredi, dep habarlaıdy QazAqparat tilshisi.
Shemonaıha aýdandyq mádenıet jáne tilderdi damytý bóliminiń basshysy Ásııa Selteevanyń aıtýynsha, qazirdiń ózinde shahardaǵy 23 kóshe jańa ataýǵa ıe bolǵan. Endi qyrkúıek aıyna deıin taǵy 16 kósheniń ataýy ózgermek. Shemonaıhalyqtar jalpyǵa ortaq iste belsendilik tanytyp, usynystardy bir aýyzdan qoldap áketýde.
«Ár kósheniń atyn ózgertpes buryn turǵyndardy jınap, túsindirý jumystaryn júrgizemiz. Birneshe kóshege osy Shemonaıha topyraǵynan shyqqan batyrlardyń esimi berildi. Qalǵandaryna Táýelsiz Qazaqstannyń qasterli uǵymdary usynylyp otyr. Ázirge qaıta atalǵan 23 kósheniń 70 paıyzyna qazaqsha ataý berildi. Turǵyndar da bul ózgeristerdi quptap otyr. Eń bastysy, barlyǵy zań aıasynda júzege asýda», - deıdi Ásııa Selteeva.
Shemonaıha aýdanynda kóshelerden bólek eldi meken ataýlary da eskiniń sarqynshaǵynan aryla almaı keledi. Ákimdik ókili bul baǵyttaǵy ózgerister kelesi jylǵa josparlanǵanyn aıtady.
«Máselen, Qyzyl Shemonaıha degen aýyl bar. Bizdiń aýdannyń da, onyń ortalyǵynyń da aty - Shemonaıha. Oǵan qosa Qyzyl Shemonaıhany qosyńyz. Bylaı qarasańyz, úsh ataý da bir-birin qaıtalap tur. Onyń ústine «Qyzyl» degen sóz de táýelsiz Qazaqstannyń kartasyna sár bermesi anyq. «Qyzylkúngeı», «Qyzylaǵash» sııaqty jer bederiniń ereksheligine baılanysty bolsa, bir sári. Ázirge ol aýyldyń naqty qalaı atalatynyn belgisiz. Biraq jańa esim alatyny anyq», - deıdi Ásııa Selteeva.
Aýdanda buǵan qosa tórt mekteptiń ataýy jańalandy. Bul usynystar qoǵamdyq keńestiń maquldaýynan ótip, oblystyq onomastıkalyq komıssııaǵa joldanypty. Mysaly, Kırov atyndaǵy orta mektep budan bylaı M.Áýezovtiń atyn almaq.
Ataýy ózgergen kóshelerdiń qatarynda aýdan ortalyǵynyń úsh ortalyq kóshesi bar. Ýrıtskıı kóshesine - Keńes Odaǵynyń batyry Serikqazy Bekbosynovtyń, Sovetskaıa kóshesine jazýshy Anatolıı Ivanovtyń, Chapaev kóshesine Halyq qaharmany Aleksandr Kaporınniń esimi berilýi múmkin. Sonymen birge, Jeltoqsan, Bastaý, Táýelsizdik, Mereı, Jastar, Ertis, Birlik syndy ataýlar ıdeologııalyq turǵydan eski ataýlardy ornynan yǵystyrmaq.
Al Oktıabrskıı aýyldyq okrýginiń Lýgovoe aýyly Jastar degen ataýǵa ıe bolýy múmkin.
