ShQO-nyń Rıdder qalasynda jańa aýrýhana men mektep salynady

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov jumys saparymen Rıdder qalasyna baryp, birqatar nysandardy aralady, dep habarlaıdy QazAqparat tilshisi.

«Rıdder qalasyna jasaǵan jumys saparym barysynda «Qazmyrysh« JShS-de boldym. Bul kásiporynnyń ǵylymı-tehnıkalyq jobalary jaqyn arada metallýrgııa salasynda ǵana emes, qaıta óńdeý ónerkásibinde de úlken serpilis jasaıdy. «Qazmyrysh« JShS basshylyǵy bizdiń ǴZTKJ óńirlik baǵdarlamasyn qoldap qana qoımaı, onyń belsendi seriktesi bolyp otyr», - dep jazdy Danıal Ahmetov Instagram-daǵy jeke paraqshasynda .

Sondaı-aq Rıdderde kópsalaly sporttyq modýl qurylysy aıaqtalyp, jańa keshen boı kóterdi. Munda júgirý, jekpe-jek jáne jattyǵý zaldary bar. Al ortalyq alańda fýtbol, voleıbol jáne basketbolmen oınaýǵa bolady. Kıim aýystyratyn jyly bólmeler de qarastyrylǵan. Jaqyn arada osyndaı jabyq modýlder oblystyń barlyq aýdandarynda paıda bolmaq.

«Aldaǵy ýaqytta Rıdderde jańa aýrýhananyń qurylysy bastalady. Quramynda 140 tósektik statsıonar men emhana bolady. Ókinishke qaraı, Qaraǵandynyń merdigeri ózine júktelgen mindetti atqarmady. Tenderdi jeńip alǵan kompanııa alǵa qoıylǵan tapsyrmany oryndaı almady. Sot otyrystary ótkizilip, endi juqpaly aýrýlar aýrýhanasynyń qurylysy qysqa merzimde aıaqtalady. Jumysqa ShQO kompanııalary kirisedi. Jalpy, Rıdderge medıtsınalyq mekemeler KVI-diń jańa tolqynyna daıyn ekenin atap ótkim keledi. Jetkilikti mólsherde 7 ÓJJ apparaty, 23 ottegi kontsentraty men sandyq rentgen bar. Qazan aıynda oblysqa 216 jedel járdem kóligi jetkiziledi», - dedi oblys ákimi.

Rıdderdi damytýǵa bıyl 2,6 mıllıard teńge bólingen. Osy jyly 600 oryndyq mekteptiń qurylysy bastalmaq.