ShQO-nyń ózen-kólderinde balyq aýlaýǵa tyıym salyndy
ÓSKEMEN. QazAqparat - Ýyldyryq shashý maýsymy bastalǵandyqtan, Shyǵys Qazaqstannyń sý qoımalarynda balyq aýlaýǵa tyıym salyndy, dep habarlaıdy QazAqparat tilshisi.
Bul shekteý ár sý qoımasynda ártúrli merzimge belgilengen. Óıtkeni, jergilikti aýmaqtyń klımaty men sý basseınderiniń qasıeti ártúrli.
«Ýyldyryq shashý kezeńinde balyq aýlaǵa tyıym salý sharalaryn retteıtin arnaıy buıryq bar. Soǵan sáıkes, Qaratal, Aqsý, Lepsi, Aıagóz ózenderinde 15 sáýirden 1 maýsymǵa deıin balyq aýlaýǵa tyıym salynady» - deıdi oblystyq tabıǵı resýrstar jáne tabıǵat paıdalanýdy retteý basqarmasynyń mamany Aqerke Tursynhanova.
Mamannyń sózinshe, Alakól, Sasyqkól, Qoshqarkól kólderinde jáne saǵalary men shyǵanaqtarynda, Úrjar, Besqopa, Yrǵaıty, Terekti, Tentek, Qatynsý, Emel, Uıaly, Qarakól, Jińishkesý, Shynjyly ózenderinde 10 sáýirden 1 maýsymdy qosa alǵandaǵy aralyqta balyq aýlaýǵa bolmaıdy.
Ertis basseınine jatatyn sý kózderinde ýyldyryq sál keshigip shashylǵanymen tyıym merzimi eki kúnge qysqa. Zaısan kólinde jáne Buqtyrma sý qoımasynyń Qaraqastan Batın shoqysyna deıingi bóliginde 16 sáýirden 30 mamyrdy qosa alǵandaǵy aralyqta qarmaq salyp, aý qurýǵa shekteý qoıylǵan. Al Batın shoqysynan Buqtyrma SES-ne deıingi bóliginde 1 mamyrdan 15 maýsymdy qosa alǵandaǵy aralyqta balyq aýlaýǵa bolmaıdy. Ertis ózeniniń ózinde Óskemennen bastap Pavlodar oblysynyń ákimshilik shekarasyna deıin 10 mamyrdan 10 maýsymdy aralyǵynda balyq aýlaýǵa tyıym engizilgen.
«Ýyldyryq shashý merziminiń bastalýyna oraı quqyq qorǵaý oryndary jer-jerlerde arnaıy reıd ótkize bastaǵan bolatyn. Reıd barysynda 49 adam balyq aýlaý erejesin buzǵany anyqtalǵan. Mysaly, Tarbaǵataı aýdanynyń Tuǵyl aýylynda 3 adam Zaısan kóline Qaıtadan jasalǵan aý qurǵan jerinen ustaldy» - deıdi oblystyq ishki ister departamentiniń baspasóz qyzmetshisi Azamat Raısov.
