ShQO-nyń orman sharýashylyǵyna 15 jyl kútken qarjy bólindi
ÓSKEMEN. QazAqparat - Shyǵys Qazaqstanda orman órtiniń aldyn alý maqsatynda tehnıkamen jabdyqtaýǵa 701 mln teńge bólindi. Mamandardyń aıtýynsha, bul qarjyny olar 15 jyl kútken, dep habarlaıdy QazAqparat tilshisi.
Shyǵys Qazaqstanda eldegi orman qorynyń 49 paıyzy shoǵyrlanǵan. Oblystaǵy orman qaýipsizdigine jaýapty 13 mekemeniń de materıaldyq-tehnıkalyq bazasy jutap turǵany talaıdan beri aıtylyp júr.
Tabıǵı resýrstar jáne tabıǵat paıdalanýdy retteý basqarmasy salanyń tehnıkalyq jabdyqtalý deńgeıi 47 paıyzdan aspaıtyny týraly aqparat ta taratqan. Ol aqparat boıynsha usaq jabdyqtardan bólek 35 shynjyrtaban men traktor, 17 órt sóndirgish kólik, jeti patrýldik kólik qajet bolatyn. Búgin sol dabyldan nátıje shyǵyp, seń qozǵalǵandaı.
Oblys bıýdjetinen bólingen qarajatqa 37 tehnıka men qural-saıman alynypty.
«Sońǵy 15 jylda bizdiń salaǵa mundaı qarajat bólingen joq. Kórsetilgen soma ótken jyldyń aıaǵynda oblys bıýdjetinen bólingen. Oǵan 13 órt sóndirgish kólik, 13 shynjyrtaban, 7 traktor jáne 4 patrýldik «ÝAZ» kóligi alyndy. Budan bólek órt sóndirýge qajet qural-saımandar satyp ákelindi» - deıdi tabıǵı resrýrstar jáne tabıǵat paıdalanýdy retteý basqarmasynyń orman sharýashylyǵy bóliminiń bas mamany Merǵazy Qabdyrǵalıev.
Bul qarajat atalǵan 13 mekemeniń tehnıkalyq qajettiligin birshama ótegenmen, maman tapshylyǵy áli de ózekti. Merǵazy Qabydyrǵalıevtiń aıtýynsha, sala qyzmetkerleriniń sany mınıstrlik bekitken shtattyq normatıvtiń 63 paıyzyn ǵana quraıdy. Al orman kútimine jaýapty mamandardyń eńbekaqysy tek 2019 jyly artady dep kútilýde.
