ShQO-nyń óndiris oryndarynda jyl basynan 15 jumysshy qaza tapty
ÓSKEMEN. QazAqparat - Shyǵys Qazaqstan oblysynda jyl basynan beri 199 jumysshy óndiriste jaraqat alǵan, onyń 15-i qaza tapty. Bul derekter oblystyq Kásipodaqtar ortalyǵynda ótken aktıv jıynynda aıtyldy, dep habarlaıdy QazAqparat altaynews.kz agenttigine silteme jasap.
2013 jyldan beri qyrkúıek aıynyń sońǵy jeksenbisi elimizde Eńbek kúni retinde belgilengen. Basqosý osy aıtýly dataǵa oraı uıymdastyryldy.
«Qaztsınk» JShS kásipodaq komıtetiniń tóraǵasy Sergeı Soldatovtyń aıtýynsha, byltyr oblysta 199 eńbekker óndiris jaraqatyn alǵan, ókinishke qaraı sonyń 15-i qaıtys bolǵan. Kásiporyndarda túrli jaraqattardyń kóp bolýyna negizgi sebep - qaýipsizdik erejeleriniń saqtalmaýy, jumysshylarǵa nusqaýlyqtyń berilmeýi. Sergeı Soldatov jazataıym jaǵdaılardy azaıtý úshin kásiporyndardaǵy tehnıkalyq ınspektorlardyń biliktiligine jiti nazar aýdarý qajettigin jetkizdi.
«Tehnıkalyq ınspektor eńbekkerlermen qaýipsizdik týraly dárister ótkizip, aqyl-keńes berip, eskertý jasap júrýi kerek», - deıdi ol.
Jıynda sóz alǵan memlekettik eńbek ınspektsııasy oblystyq basqarmasynyń basshysy Baqytbek Qızatov jyl basynan beri ózi jetekshilik etetin vedomstvonyń eńbek ujymdarynda 417 kemshilik anyqtalǵanyn alǵa tartty.
Eńbek adamynyń quqyǵyn buzýdyń eń óreskel formasy - eńbekaqysyn tolyq tólemeý nemese ýaqytynan keshiktirip tóleý.
«Oblysta jyl basyndaǵy jaǵdaı boıynsha eńbekaqy bereshegi 705 mıllıon teńgeni quraǵan-dy. Inspektsııanyń aralasýymen qazir bul qaryzdyń 606 mıllıon teńgesi tólengen. Qalǵan bereshegi bar 6 kásiporynmen jumystar júrgizilip jatyr», - dedi Baqytbek Qızatov.
Osy rette atap óterlik másele - kóptegen jumys berýshilerdiń eńbekkerlermen tıisti shartty jasamaýy. Osydan kelip kóptegen túıtkilder týyndap jatady. Sol sebepti ár azamat jumysqa ornalasqan sátte eńbek shartynyń jasalýyn qatań talap etýi tıis.
Osyǵan oraı, qazir Úkimet eńbek sharttaryn elektrondy formatqa kóshirýdi bastap otyr, onyń maqsaty - saladaǵy jarııalylyqty qamtamasyz etý.
