ShQO-nyń medıtsınalyq mekemelerine 60 jedel járdem kóligi berildi
ÓSKEMEN. QazAqparat – Shyǵys Qazaqstan oblysyndaǵy medıtsınalyq mekemeler 60 jańa jedel járdem kóligimen tolyqty, dep habarlaıdy QazAqparat tilshisi.
Oblystyq bıýdjet qarajatyna satyp alynǵan jedel járdem kólikteri jergilikti «SEMAZ» JShS-da shyǵarylǵan. Olar ShQO jáne Semeı qalasyndaǵy jedel medıtsınalyq járdem aýrýhanalarynyń stantsııalarynda sap túzemek.
Aımaq basshysy Danıal Ahmetov jaqyn arada oblystyń qalalary men aýdandaryndaǵy barlyq jedel járdem bólimderine jol tartatyn bul otandyq kólikterge oń baǵasyn berdi.
«Búginde 60 kólik jumysqa daıyn. Onyń 40-y Óskemenge jiberiledi. Jedel járdem kólikteri medıtsınalyq qyzmet sapasyn arttyrady. Biz olardyń naýqastarǵa qysqa ýaqyt ishinde jedel jetýin qamtamasyz etýimiz kerek. 13 qarashada taǵy 40 kólik daıyn bolady. Olardyń barlyǵy Semeı qalasynyń jedel járdem bólimine beriledi. Bul normatıvtik deńgeıden eki ese artyq. Odan keıin, jyl sońyna deıin basqa aýdandardy da jasaqtaımyz. Bul sharalar koronavırýspen kúreste óz septigin tıgizetinine senimdimin», - dedi Danıal Ahmetov.
Sanıtarlyq avtokólikter barlyq halyqaralyq standarttarǵa saı. Olar shuǵyl medıtsınalyq kómek kórsetýge arnalǵan ókpeni jasandy jeldetý apparattarymen, EKG, defıbrıllıatorlarmen, pýlsoksımetrlermen jáne basqa da qajetti apparattarmen tolyqtaı jabdyqtalǵan. Osy jyldyń sońyna deıin medıtsınalyq uıymdarǵa jalpy sany 216 jedel járdem kóligi berilmek.
Aıta keteıik, shalǵaı aýyldardaǵy turǵyndardy medıtsınalyq kómekpen qamtamasyz etý úshin densaýlyq saqtaý mekemelerine 10 jyljymaly medıtsınalyq keshen jetkizildi. Atap aıtqanda, Rıdder qalasy, Kúrshim, Tarbaǵataı, Katonqaraǵaı, Glýbokoe, Abaı, Jarma, Kókpekti, Besqaraǵaı jáne Shemonaıha aýdandary atalmysh keshenmen qamtamasyz etilgen.
