ShQO-nyń medıtsına mamandary alǵash ret búırek aýystyrdy
ÓSKEMEN. QazAqparat - Shyǵys Qazaqstan oblysynda alǵash ret búırekti aýystyrý boıynsha operatsııalar jasaldy, dep habarlaıdy QazAqparat tilshisi ShQO Іshki saıasat basqarmasyna silteme jasap.
Shyǵys Qazaqstan oblysyndaǵy Transplantologııa ortalyǵy respýblıkadaǵy tórt óńirlik transplantatsııa ortalyqtarynyń biri. Elimizdiń shyǵys óńiriniń ózinde ǵana búırek transplantatsııasyna 500 adam zárý bolyp shyqty. 26 jáne 27 maýsym kúnderi ortalyqta búırek almastyrýdan alǵashqy ret eki ota jasalyp, olar sátti ótti.
Transplantatsııa boıynsha respýblıkalyq úılestirý ortalyǵynyń jetekshisi, professor Jaqsylyq Dosqalıev basqarǵan jergilikti hırýrgter tórt saǵat boıy eń qıyn operatsııalardyń birin jasady. Óskemen qalasynyń 56 jastaǵy turǵyny óziniń 32 jastaǵy ulyna búıregin berip, donory atandy. Dál qazir er adam emin jalǵastyrýda.
Jaqsylyq Dosqalıevtiń aıtýynsha, shyǵysqazaqstandyq dárigerlerdiń ózdiginshe operatsııa júrgizýge bilimderi de, tájirıbeleri de jetkilikti.
«Oblys ákimi Danıal Ahmetovtiń qoldaýymen, óńirde jańartylǵan operatsııa jasaý júıesi jasalǵan. Emhanada kúrdeli otalar jasaý úshin barlyq jaǵdaı bar. Transplantologııa ortalyǵynyń keleshegi zor, munda tek búırek qana emes, sondaı-aq, ókpe, baýyr almastyrý boıynsha operatsııalar ótkizýge bolady. Eń bastysy - jergilikti dárigerlerdiń jumysyn adal isteýge degen yntasy joǵary bolsa, bolǵany. Aıta ketý kerek, búginde transplantatsııalyq operatsııa óńirdiń barlyq turǵyndary úshin qoljetimdi bolyp otyr», - dedi proefessor.
Dárigerler ekinshi operatsııany óz betterimen sátti alyp shyqqan. Bul joly ota Kúrshim aýdanynan kelgen Anar Áýbákirovaǵa jasaldy. Áıelge 2015 jyly «glamırdi nefrıt» dıagnozy qoıylǵan. 2017 jyldyń qazan aıynan beri naýqas gemodıalız jasatý úshin 3 ret aýrýhanaǵa kelýge májbúr bolǵan.
«Maǵan Shyǵys Qazaqstandaǵy alǵashqy otany jasaýǵa usynys túskende kóp oılanbastan, birden kelisimimdi berdim. Sheginerge jol bolmady. Týǵan ápkem maǵan donor boldy. Ekeýmizdiń sáıkestigimiz óte jaqsy bolǵandyqtan, ota men odan keıingi saýyǵý ýaqyty qıyndyqsyz ótti», - dedi Anar Áýbákirova.
Búginde naýqastyń jaǵdaıy jaqsy, aýrýhanadan shyǵýǵa daıyndalyp jatyr.
