ShQO-nyń Mahovka ózeninde balyq qyryldy
ÓSKEMEN. QazAqparat – Shyǵys Qazaqstan oblysy Glýbokoe aýdanyndaǵy Mahovka ózeninde balyq qyryldy, dep habarlaıdy QazAqparat tilshisi.
ShQO Ekologııa departamenti baspasóz qyzmetiniń málimetine súıensek, Solnechnyı kentiniń turǵyndary Mahovka ózeninde balyq qyrylǵanyn kórip, dabyl qaqqan. Oqıǵa ornyna departament mamandary shuǵyl jetken. Olar jaǵalaýdy sholyp, hımııalyq taldaý úshin sýdan synama aldy.
Belgili bolǵandaı, balyq osydan bir apta buryn qyrylǵan. Glýbokoe aýdandyq veterınarııalyq ınspektsııasynyń qyzmetkerleri óli balyqty jınap aldy.
«Buǵan deıin bizge «Taza Óskemen» mekemesiniń Mahovka ózenin lastaǵany jaıly aryz túsken edi. Soǵan oraı kásiporynǵa jospardan tys tekserý júrgizildi. Anyqtalǵandaı, 20 mamyrda mekemege tıesili tazartý qondyrǵysynyń sorǵyshy isten shyqqan», - delingen aqparatta. Sonyń saldarynan sý qoımasyna laı qospalary bar sý tógildi. Sol úshin «Taza Óskemen» KMK-ge 9 700 344 teńge mólsherinde aıyppul salynyp otyr.
Eske salsaq, osyǵan deıin Shyǵys Qazaqstan oblysynda brakonerlerden 2 tonnadan astam balyq tárkilengenin habarlaǵan edik.
