ShQO-nyń Qyzyltý ótkelinde 7 kólik sýǵa batty
ÓSKEMEN. QazAqparat - Shyǵys Qazaqstan oblysy Kúrshim aýdanyndaǵy Qyzyltý ótkeli jabylǵaly beri jeti kólik sý astyna ketken, dep habarlaıdy QazAqparat tilshisi.
Qańtardyń aıazynan keıin sý betindegi muz beti qalyńdady degen oı turǵyndardy kózsiz táýekelge jeteleýde. Al, Shyǵys óńirlik aeroutqyr jedel qutqarý jasaǵynyń mamandary porom toqtaǵaly jeti kólik sýǵa ketkenin aıtyp otyr.
«Qys bastalǵaly jeti kólik sý astyna ketti. Bir kólik Aqsýat aýylynyń tusynda, ekeýi ótkeldiń mańaıynda 15 metr tereńdikte, qalǵan tórteýi Alǵabas aýylynyń tóńireginde jatyr. Sońǵy tórt kólik balyqshylardiki bolǵan»,- deıdi sýdan qutqarý qyzmetiniń mamany Anatolıı Rojkov.
Mamandar qazirgi tańda Buqtyrmadaǵy muzdyń qalyńdyǵy 36 santımetrge jetkenin aıtady.
«Muzdyń qalyńdyǵy ýaqtyly ólshenip turady. Qazirgi tańda ótkelden salmaǵy 2,5 tonnaǵa deıingi kólikter ǵana óte alady» - deıdi jolaýshylar kóligi jáne avtomobıl joldary basqarmasynyń mamany Nurbek Turarov.
Alaıda Anatolıı Rojkov sál jylymyq sezilse, muz jipsı qalatynyn aıtady.
«Mundaı muzben qandaı qalyń bolsa da júrý qaýipti. Ásirese balyqshylar qutqarýshylardyń sózine qulaq aspaıdy» - deıdi maman.
