ShQO-nyń kommýnaldyq mekemelerinde jalaqy qanshaǵa artady

ÓSKEMEN. QazAqparat – Shyǵys Qazaqstan oblysyndaǵy kommýnaldyq qyzmet mekemelerinde maman tapshylyǵy máselesi ózekti kúıinde qalyp otyr, dep habarlaıdy QazAqparat tilshisi.

Oblys halqyn jylýmen, sýmen, jaryqpen qamtamasyz etip otyrǵan kommýnaldyq qyzmet kórseteting mekemelerde maman tapshy. Shyǵys Qazaqstan oblystyq Tabıǵı monopolııalardy retteý departamentiniń málimetine súıensek, buǵan jalaqynyń azdyǵy sebep bolyp otyr.

«Ótken jyldyń ózinde kommýnaldyq qyzmetterden 2 myńǵa jýyq adam jumystan shyqqan. Onyń ishindegi 90 paıyzy jumystan óz erkimen ketti. Jaǵdaıdy túzetip, aldaǵy jylytý maýsymyna daıyndyq jumystarynyń talapqa saı júrýi úshin óńirdegi kommýnaldyq qyzmet kórsetetin kásiporyndar jalaqyny kótermek», - deıdi departament basshysy Arman Málik.

Máselen, Shyǵys Qazaqstan oblysyndaǵy elektrmen jabdyqtaý salasyndaǵy kásiporyndardyń jumysshylaryna jalaqy eki esege deıin ósedi.

«Elektr energııasy salasyndaǵy kásiporyndar 350-den astam jumysshynyń jalaqysyn 140 myń teńgeden 247 myń teńgeden astamǵa kótermek.

Jylýmen qamtý salasyndaǵy bir jarym myńnan astam jumysshynyń jalaqysy joǵarylaıdy. Naqty aıtqanda, 167 myń teńgeden 227 myń teńgege deıin kóteriledi. Ósim 36 paıyzdy quraıdy.

Sýmen jabdyqtaýshy mekemelerdiń 670-ten astam jumysshysynyń eńbekaqysy 112 myń teńgeden 146 myń teńgege deıin kóteriledi», - deıdi A.Málik.