ShQO-nyń Katonqaraǵaı aýdanynda týrızm qarqyndy damýda

KATONQARAǴAI. QazAqparat – Shyǵys Qazaqstan oblysynyń Katonqaraǵaı aýdanyna keletin týrıster sany jyldan-jylǵa arta túsýde. Árıne, týrıster úshin eń qyzyqty ári tartymdy oryndardyń biri, ol Muztaý taýy bolyp tabylady. Altaıdyń eń bıik shyńy, tańǵajaıyp jaratylysymen týrıster men alpınısterdi qashanda ózine tarta túsedi. Sondaı-aq, el ishinde «Rahman qaınarlary» týraly da ańyzdar kezdesedi. Aýdannyń taǵy bir kórnekti jeri – Berel qorǵandary, dep habarlaıdy QazAqparat.

Katonqaraǵaı aýdanynyń ákimi Renat Qurmambaevtyń aıtýynsha, bıyl pandemııa jaǵdaıynda týrıster sany eki esege artqan. Onyń pikirinshe, másele taza aýada jáne ekologııalyq taza ónimderde – adamdar aǵzany ońaltý, óz densaýlyǵyn jaqsartý úshin Katonqaraǵaıǵa barady.

Jalpy, týrızm salasynda aýdanda demalýshylarǵa «Rahman qaınary» shıpajaıy, 12 pantamen emdeý orny, 5 qonaqúı jáne qonaqtarǵa arnalǵan úlken 12 úı-jaı óz qyzmetterin usynady.

«Sonymen qatar, Buqtyrma sý qoımasynyń jaǵalaýynda demalys bazasynyń qurylysy júrgizilýde. Qazirgi ýaqytta úıler, ashana tolyǵymen salyndy. Basseınniń qurylysy júrgizilýde. Bul jobany 2021 jyly iske qosý josparlanyp otyr.

Budan bólek, qazirgi ýaqytta «Baıan» saýyqtyrý keshenin keńeıtý, Topqaıyń aýylynda 60 oryndyq emdeý-saýyqtyrý keshenin, 100 oryndyq pantymen emdeý ortalyǵyn salý boıynsha jumystar júrgizilýde», - dep málim etti ShQO Aqparat ortalyǵynan.