ShQO-nyń Katonqaraǵaı aýdanynda Astana kúni merekesi keń aýqymda atalyp ótti
ASTANA. 7 shilde. QazAqparat /Gúlmıra Álıakparova/ - Shyǵys Qazaqstan oblysy Katonqaraǵaı aýdanynyń turǵyndary Astana kúni merekesin keń aýqymda atap ótti.
Bul týraly aýdannyń ishki saıasat, mádenıet jáne tildi damytý bóliminen habarlady.
Astana búginde jas memleketimizdi jáne halqymyzdy álemge áıgilep, alpaýyt eldermen terezemizdi teń etýge septigin tıgizip jatqan shyn mánindegi bas qalaǵa aınaldy. 6 shilde kúni Úlken Naryn aýylynyń ortalyq alańynda Astana kúnine arnalǵan birqatar merekelik is-sharalar ótti. Al keshqurym aýdan ortalyǵynyń uıymdary men mekemeleriniń qyzmetkerleri Astana qalasyna arnap quttyqtaý sózder men izgi tilekter jazylǵan urandar ustap, ortalyq kóshelermen júrip ótti.
Odan keıin Katonqaraǵaı aýdanynda alǵash ret Shyǵys Qazaqstan oblysynyń eń úzdik shyǵarmashylyq ujymdarynyń qatysýymen aýqymdy kontsert boldy. Olardyń arasynda oblystyq jáne respýblıkalyq deńgeıdegi Kóńildiler men tapqyrlar klýby saıystarynyń kóp márte júldegeri - «Reality.KZ» KTK komandasy, vokaldan oblystyq baıqaýlardyń laýreaty, qalalyq «Stýdenttik kóktem-2011» baıqaýynda «eń úzdik vokal» atalymynyń jeńimpazy atanǵan - Álibek Dosymbaev, kóptegen ánshilik baıqaýlardyń júldegeri Aleksandr Belokov, oblysta tanymal «Asyl -Mura» toby sondaı-aq, Óskemen qalasynyń úzdik dı-djeılary boldy.
Elordanyń týǵan kúnimen katonqaraǵaılyqtarǵa óz quttyqtaýyn aýdan ákimi Arman Bekbosynov joldady. «Sizderdi Elorda kúni merekesimen shyn júrekten quttyqtaımyz! Jas, ári qarqyndy damyǵan Astana - namysshyl jáne órisi bıik táýelsiz elimizdiń nysanyna aınaldy. Astanany kóshirý týraly sheshim syndarly jyldarda shyǵarylsa da, tarıh munyń strategııalyq múddeden týyndaǵan batyl qadam ekendigin dáleldep berdi. Astana jańa Qazaqstannyń saıası, ekonomıkalyq jáne mádenı ómiriniń ortalyǵy mártebesine ıe boldy. Astana kelbeti kúnnen-kúnge ózgerýde. Ýaqyt ótken saıyn kórkeıip, asqaqtaı túsýde. Táýelsiz Qazaqstannyń bas qalasy eldiń qarqyndy damýynyń jarqyn kórinisine aınaldy. Sondyqtan barlyǵymyz «Bizdiń Otanymyz - Qazaqstan, bizdiń elordamyz - Astana!» dep maqtanyshpen aıtamyz», - delingen onda.
Merekeniń sońynda Astana qalasynyń qurmetine merekelik otshashý boldy.
