ShQO-nyń qar basqan aýmaǵy 73-ten 66 paıyzǵa deıin azaıdy

ÓSKEMEN. QazAqparat – Shyǵys Qazaqstan oblysynda sý tasqyny qaýpi bar jerlerge aerovızýaldy monıtorıng júrgizildi, dep habarlaıdy QazAqparat tilshisi.

«Monıtorıngti oblys ákiminiń orynbasary Nurjan Jumadilov, aımaq prokýrorynyń orynbasary Azamat Tileshev jáne TJD bastyǵy Erlan Nurpeıisov júrgizdi. «Qazavıaqutqarý» AQ-nyń MI-171 tikushaǵymen ushý barysynda qar qalyńdyǵy, «Óskemen-Glýbokoe-Shemonaıha-Borodýlıha» baǵyty boıynsha ózenderdiń jaı-kúıi jáne Ertis ózenindegi gıdrologııalyq jaǵdaı tekserildi», - delingen ShQO Tótenshe jaǵdaılar departamenti baspasóz qyzmetiniń málimetinde.

Qazirgi ýaqytta óńirde qar jyldam qarqynmen erip jatyr. Oblystyń qar basqan aýmaǵy 73%-dan 66%-ǵa deıin azaıdy. Shaǵyn ózenderde muzdyń erýi baıqalady.

Jalpy, Shyǵys Qazaqstan oblysynda sý tasqynynyń aldyn alýǵa 104 myń dana qap, 6,7 myń tonna ınertti materıal daıyndalǵan. Tehnıka men motopompalar saqadaı saı.

Aıta keteıik, oblys boıynsha 399 myń tekshe metr qar shyǵaryldy. 3908 sý ótkizý qurylystary, 588 shaqyrym aryq pen arnalar, 578 kópir tazartyldy.