ShQO-nyń eki qalasynda karantın talaptaryn buzǵandar anyqtaldy
ÓSKEMEN. QazAqparat - Shyǵys Qazaqstan oblysynda karantın shekteýleriniń saqtalýyn baqylaý maqsatynda kún saıyn reıdter júrgizilýde, dep habarlaıdy QazAqparat tilshisi.
27 qańtarda sanıtarlyq normalardy buzý faktileri eki qalada tirkelip otyr.
Óskemende reıd 111 nysanda júrgizildi. Nátıjesinde azyq-túliktik emes dúkenderde satýshylardyń maskasyz qyzmet kórsetýi boıynsha 4 fakti anyqtaldy.
«Semeıde monıtorıngtik toptar 190 nysandy tekserdi. Eki ereje buzý faktisi tirkeldi, atap aıtqanda Qozybaǵarov, 38 meken-jaıyndaǵy ashananyń eki qyzmetkeri maska rejımin buzǵan. Sonymen qatar reıd barysynda 35 avtobýs tekserildi. Maska rejımin buzýǵa qatysty 28 adamǵa eskertý jasaldy», - delingen ShQO Aqparat ortalyǵy taratqan málimette.
