ShQO-nyń demalys aımaqtarynda 1000 jer telimi bos jatyr

ÓSKEMEN. QazAqparat - Shyǵys Qazaqstannyń týrıstik aýmaqtarynda myńnan astam jer telimi óz maqsatyna paıdalanylmaı otyr, dep habarlaıdy QazAqparat tilshisi.

Bul másele sońǵy 2-3 jyldyń kóleminde kún tártibinen túspeı keledi. Ótken jyldy qorytyndylaǵan týrızm jáne syrtqy baılanystar basqarmasy atalmysh túıtkilge taǵy da toqtaldy.

Demalys oryndaryn ınventarızatsııalaý kezinde Alakól, Sibe kólderi jáne Buqtyrma sý qoımasy aýmaqtarynda 1105 jer telimi bos jatqany anyqtalǵan.

«Alakólde - 100, Sibede - 261, Buqtyrmada - 644 telim maqsatyna saı paıdalanylmaı tur. Biz jer ıelerine eskertý hat jibergenbiz. Olar qoldaryna eskertý tıgen sátten bastap, bir jyldyń ishinde jumysty bastaýy tıis. Eskertý merzimderi jýyqta bite bastaıdy. Osy kezge deıin shyrpy basyn da syndyrmaı, eskertýge qulaq aspaǵandardyń jeri sot arqyly memleket menshigine qaıtarylady. Óıtkeni, atalmysh aýmaqtarǵa ınvestorlardyń qyzyǵýshylyǵy joǵary» - deıdi basqarma basshysynyń mindetin atqarýshy Marat Qabaqov.