ShQO-nyń «Tsıfrlyq Qazaqstan» boıynsha jetistikteri qandaı
Qazirgi ýaqytta Shyǵys Qazaqstanda eki IT-ortalyq jumys istep tur. Onyń biri Joǵarǵy polıtehnıkalyq kolledjde, ekinshisi Elektrotehnıkalyq kolledjde ornalasqan. Onda stýdentter bilim nárimen sýsyndap, oqytýshylar tájirıbeden ótýde.
ShQO-daǵy 648 mektepte IT-synyp bar. Atalmysh synyptar tereńdetilgen tsıfrlyq baǵdarlama boıynsha iske qosylyp, álemdik standarttarǵa saı jabdyqtalǵan. Jyl saıyn oblystyq chempıonattar men ІT-hakaton uıymdastyrylady. Budan bólek, «Jastar time» ınnovatsııalyq ortalyǵy ashyldy.
«COVID-19 pandemııasyna baılanysty qashyqtan oqytý digitalkz.kz portalynda júzege asyryldy. Osy arqyly 21 myńnan astam adam oqyǵan. Shalǵaıdaǵy eldi meken turǵyndary úshin 11 elektrondy qyzmet kórsetý ortalyǵy ashyldy. Al osy jyldyń 1 qyrkúıegine deıin dál osyndaı 3 ortalyq jumysyn bastamaq. Tsıfrlyq oqytýdyń qorytyndysy boıynsha elektrondy qyzmetterdiń úlesi artqan. Halyqqa kórsetilgen qyzmet 2019 jylmen salystyrǵanda 6% artty», – dep habarlady ShQO Aqparat ortalyǵynan.
Óńirlik elektrondy qyzmet kórsetý ortalyǵy bıznes salasy boıynsha kórsetiletin 6 qyzmettiń mobıldi nusqasyn iske qosty. Oblys boıynsha 565 óz-ózine qyzmet kórsetý buryshy ashyldy. Onda 476 myńnan astam qyzmet kórsetildi. KVI pandemııasy kezinde Halyqqa qyzmet kórsetý ortalyqtary qashyqtan qyzmet kórsetýge kiriskende óz-ózine qyzmet kórsetý buryshtary arqyly 30 myńnan astam elektrondy qyzmet kórsetilip, 2,5 myń tsıfrlyq kilt jasalyp, 746 adam mobıldi azamat bazasynyń qosymshasyna tirkeldi.
«Sonymen qatar Óskemende foto-vıdeofıksatsııalaý jáne vıdeosaraptama jasaý jobasy aıasynda 4 myńǵa jýyq «Sergek» kamerasy iske qosylǵan. Kameralar 159 qıylys pen jelilik ýchaskelerde oryn alǵan zańbuzýshylyqtardy tirkep otyrady. Bıyl atalmysh kameralardyń kómegimen 5092 ákimshilik quqyqbuzýshylyq anyqtalyp, 84 qylmystyq is qozǵaldy. Qoǵamdyq oryndardaǵy qylmys 37%, qala kóshelerinde 41%, jol-kólik oǵıǵalary 36% tómendedi. Keshendi taldaýdyń nátıjesinde azamattardyń senimi artty», - delingen málimette.
Oblystaǵy medıtsına salasynyń 99% densaýlyq saqtaýdyń elektrondy pasportymen qamtamasyz etilgen. Turǵyndardyń 77% mobıldik qosymsha arqyly kómekke júginedi. «DamuMed» platformasynda «Patsıentterdi onlaın qabyldaý» júrgiziledi. Tsıfrlyq qyzmet monıtorıngi oblystaǵy qalalar men aýdandarda da iske qosyldy. Osy arqyly provızorlyq jáne ınfektsııalyq statsıonardaǵy jaǵdaıdy baqylap, PTsR, KT men rentgen boıynsha jasalǵan zertteý jumystaryn qaraýǵa bolady.
ShQO Aqparat ortalyǵynyń dereginshe, Semeıde jolaqyny elektrondy túrde tóleý maqsatynda «Avtobys» júıesi iske qosyldy. «Bus Report» baǵdarlamasy boıynsha árbir avtobýstyń baǵytyn baqylaýǵa bolady. 2020 jyldyń qazan aıyna deıin Óskemendegi qoǵamdyq kólikterde dıspetcherlik aqparattyq modýldiń kómegimen jolaqy tóleýdi avtomattandyrý josparlanýda.