ShQO-nyń burynǵy aýdandaryn qalpyna keltirýge 10-15 mlrd teńge kerek – UEM

ASTANA. QazAqparat – Ulttyq ekonomıka vıtse-mınıstri Baýyrjan Omarbekov Shyǵys Qazaqstan oblysyndaǵy burynǵy Katonqaraǵaı jáne Úlken Naryn aýdandaryn, burynǵy Kúrshim jáne Marqakól aýdandaryn qaıta bólý múmkindigi týraly vedomstvo ustanymyn aıtty, dep habarlaıdy QazAqparat tilshisi.

«Shekara mańyndaǵy aýdandardy qalpyna keltirý máselesin buǵan deıin Úrjar, Kúrshim, Katonqaraǵaı, Tarbaǵataı aýdandaryndaǵy burynǵy aýdan ortalyqtarynyń turǵyndary kótergen bolatyn.

Shyǵys Qazaqstan oblysy ákimdiginiń aqparaty boıynsha, buryn jergilikti jáne aýmaqtyq atqarýshy organdardyń aýdandyq bólimderi ornalasqan barlyq burynǵy ǵımarattar kommýnaldyq menshikte saqtalmaǵan (buzylǵan nemese jekeshelendirilgen jáne aýktsıon arqyly satylǵan)», - dep jazylǵan vıtse-mınıstrdiń QazAqparat saýalyna joldaǵan jaýabynda.

Vedomstvo mamandary atalǵan aýdandardy qaıtadan derbes aýdan etip shyǵarýdyń shyǵyndaryn eseptegen kórinedi.

«Tıisti esepteýler nátıjesi boıynsha ákimshilik ǵımarattardy salý, kúrdeli jóndeý júrgizý, memlekettik organdardyń shtat sanyn ustaý jáne materıaldyq-tehnıkalyq bazany nyǵaıtý úshin naqtylanǵan derekter boıynsha ár aýdandy qaıta qalpyna keltirýge shamamen 10-15 mlrd teńge qajet», - delingen jaýapta.