ShQO-nyń birqatar mektepterinde oqýlyqtar jetispeıdi - BAQ
ASTANA. QazAqparat - Jańa oqý jylynyń alǵashqy aıy aıaqtalyp qalǵanyna qaramastan oblystyń birqatar mektepterinde oqýlyqtar jetispeıdi. Ásirese 9-synypqa arnalǵan zaıyrlylyq jáne din negizderi oqýlyǵy keıbir bilim oshaqtaryna múlde jetkizilmegen. Osy máseleniń mánisin túsindirip berýdi biz Shyǵys Qazaqstan oblysynyń bilim salasyndaǵy baqylaý departamentiniń basshysy Erkimbek Aıazbaevtan ótingen edik, dep jazady «Dıdar» gazeti.
Shyǵys Qazaqstan oblysynyń bilim ordalaryn 2016-2017 oqý jylynda oqýlyqtarmen jáne oqý ádistemelik quraldarmen jabdyqtaýǵa bıýdjetten 786 mln tenge kóleminde qarjy qarastyrylǵan.
«Orta bilimniń jańartylǵan mazmunyna kóshýge baılanysty bıyl 1-synypqa barǵan balǵyndardyń barlyǵy jańa baǵdarlamaǵa sáıkes biryńǵaı bazalyq oqýlyqtarmen oblys kóleminde júz paıyz qamtyldy. Biryńǵaı bazalyq oqýlyqty engizý bıýdjettik qarjyny únemdeýge, oqýlyqtardy jergilikti jerlerge jetkizýdi jyldamdatýǵa, mazmunyn únemi jańartyp otyrýǵa múmkindik beretinimen tıimdi. Alaıda, jumys dápteriniń jetispeýshiligi bar. Keıbir qala men aýdandyq bilim bólimderinde qarjynyń tapshylyǵynan jumys dápterlerine jetkilikti kólemde tapsyrys berilmegeni belgili boldy. Óskemen qalasy, Kúrshim, Ulan aýdandarynda atalmysh oqý quralymen oqýshylardyń 97-98 paıyzy qamtylǵan. Aıta keterligi, qoldanystaǵy zańnama talaptaryna sáıkes, jumys dápteri bıýdjettiń esebinen satyp alynatyn quralǵa jatpaıdy. Degenmen, ata-analardyń, mektep basshylarynyń kómegimen bul tyǵyryqtan shyǵýdyń joldary qarastyrylyp jatyr», - deıdi departament basshysy.
Erkimbek Aıazbaevtyń túsindirýinshe, qalǵan oqý ádistemelik quraldaryn satyp alýǵa ata-ana men basqa da qarjy kózderin paıdalanýǵa bolady. Bıyl qorlandyrý tsıklynyń esebinen 8-9 synyptarǵa jańa oqýlyqtar alynýǵa tıis. Osyǵan oraı, bul toptarǵa qajetti oqýlyqtardyń da kesheýildep túsken jaǵdaılary tirkelgen. Mysaly, Glýbokoe aýdanyna 8 synypqa arnalǵan oqýlyq qyrkúıektiń jıyrmasynda ǵana jetken. Tarbaǵataı men Kókpekti aýdandary da ýaqytynda qamtamasyz etilmeı jatyr. 9-synypqa arnalǵan zaıyrlylyq jáne din negizderi oqýlyǵy Besqaraǵaı, Glýbokoe, Kúrshim, Shemonaıha aýdandaryna ýaqytynda túspegen. Besqaraǵaıdaǵy Kananerka orta mektebiniń 8-synyp oqýshylarynyń 16 paıyzy ǵana qamtylsa, 9-synyptar úshin oqýlyq múlde kelmegen. Ulan aýdanyndaǵy Amanjolov, Gagarın orta mektepteriniń 8-synyp oqýshylarynyń 20 paıyzy ǵana oqýlyqqa qol jetkizgen. Osy jáne Shemonaıha aýdanyndaǵy mektepterde de osy kemshilik kezdesedi. Óskemen qalasynyń bilim shańyraqtaryn teksergen kezde №№ 4, 5, 15, 19, 20, 22, 46 mektepterinde osy oqýlyqtyń tolyq kólemde jetpegeni anyqtalǵan.
«Bul keleńsizdikterdiń barlyǵy qarajattyń jetispeýshiliginen týyndap otyr. Sondyqtan jergilikti atqarý organdary osy máseleni jetkilikti zerdelep, jedel túrde sheshý úshin shuǵyl sharalardy qarastyrýlary qajet. Ata-analar komıtetinen, basqa da jeke tulǵalardan oqýlyqtardyń jetispeýshiligine qatysty olqylyqtar kezdesken kezde Shyǵys Qazaqstan oblysynyń bilim salasyndaǵy baqylaý departamentiniń 21-65-38 senim telefonyna nemese vkocontrol.gov.kz saıtyna habarlaýdy suraımyz», - dedi Erkimbek Aıazbaev.
Aına Eskenqyzy
