ShQO-nyń birqatar qalasynda karantın talaptary kúsheıtildi
ÓSKEMEN. QazAqparat – Shyǵys Qazaqstan oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń mindetin atqarýshy Talǵat Tuńǵyshbaev Óńirlik kommýnıkatsııalar qyzmetinde ótken brıfıng barysynda 10 qarashada shyqqan №24 qaýlynyń tarmaqtaryna toqtalyp ótti.
Shyǵys Qazaqstanda 10 qarashada koronavırýstyq ınfektsııany juqtyrýdyń 237 jańa jaǵdaıy tirkeldi, dep habarlaıdy QazAqparat oblystyń Aqparat ortalyǵyna silteme jasap.
Ortalyq tartqan málimetterge qaraǵanda, jańa qaýly talaptaryna sáıkes karaoke, bılıard, kompıýterlik klýbtar, túngi klýbtar, boýlıng – ortalyqtar, jabyq úı-jaılardaǵy balalar oıyn alańdary men attraktsıondary, kınoteatrlar, býkmekerlik keńseler, fýdkort sııaqty oıyn-saýyq mekemeleriniń jumysy toqtatyldy.
Óskemen, Rıdder, Serebrıansk qalalarynda jáne Altaı aýdanynyń Jańa Buqtyrma kentinde epıdemıologııalyq jaǵdaıdyń kúrdelenýine baılanysty kınoteatrlardyń, monshalardyń, saýnalardyń, basseınderdiń, teatrlardyń, mádenıet obektileriniń, kitaphanalardyń, mýzeılerdiń, fıtnes-ortalyqtardyń jáne sporttyq-saýyqtyrý ortalyqtarynyń, trenajer zaldarynyń, sport keshenderiniń, SPA-ortalyqtardyń jumys isteýine tyıym salyndy.
Qoǵamdyq tamaqtandyrý obektileri endi demalys jáne mereke kúnderi qyzmetin toqtata otyryp, saǵat 7-den 22.00-ge deıin jumys isteı alady. Bul rette, osy obektiler jetkizý jáne alyp ketý tártibin saqtaı otyryp, shekteýsiz onlaın rejımde jumys isteı alady.
Azyq-túlik satpaıtyn saýda nysandarynyń, sulýlyq salondarynyń, shashtarazdardyń, kólik jýý oryndarynyń, kir jýý oryndarynyń, fotosalondardyń, bıznes ortalyqtardyń jáne basqa da keńse ǵımarattarynyń jumys rejımi mereke jáne demalys kúnderi qyzmetin toqtata otyryp, tańǵy saǵat 7-den 19.00-ge deıin bolyp belgilendi.
- 5 jasqa deıingi balalardv, ashyq alańda sportpen shuǵyldanatyn jáne jeke kólikte otyrǵan adamdardy esepke almaǵanda, barlyq jeke tulǵalar úshin medıtsınalyq maska taǵý rejımin saqtaý talap etiledi.
«65 jasqa deıingi azamattarǵa jáne sozylmaly aýrýlary bar adamdarǵa úıden dárihanaǵa shyǵýǵa, tólem jasaý, kommýnaldyq qyzmetterdi tóleý jáne saýda jasaý úshin mekemelerge, jumysqa barýǵa ruqsat etiledi», - dep atap ótti Talǵat Tuńǵyshbaev.
Esterińizge sala keteıik, Shyǵys Qazaqstan koronavırýs juqtyrýdyń eń joǵary kórsetkishine baılanysty «qyzyl aımaqqa» endi. Sondaı-aq, atalǵan qaýlyǵa sáıkes shekteý sharalary Shyǵys Qazaqstan oblysynyń barlyq aýmaǵynda 2020 jylǵy 25 qarashaǵa deıin uzartyldy.
