ShQO-nyń birqatar aýdanynda dene shynyqtyrý-saýyqtyrý kesheni boı kóteredi

ÓSKEMEN. QazAqparat – Shyǵys Qazaqstan oblysynda jyl sońyna deıin birqatar aýdanda dene shynyqtyrý-saýyqtyrý kesheni salynady, dep habarlaıdy QazAqparat tilshisi.

Búgin aımaq basshysy Danıal Ahmetov qala jáne aýdan ákimderimen áleýmettik nysandar qurylysy jóninde keńes ótkizdi.

«Osy jyldyń ózinde óńirdiń kóptegen eldi mekenderinde jańa dene shynyqtyrý-saýyqtyrý keshenderi men mádenıet úıleri paıdalanýǵa beriledi. Jaýapty tulǵalarǵa áleýmettik nysandardy salýda qajettilik pen demografııalyq jaǵdaıdy esepke alý kerektigin eskerttim. Mysaly, Semeıdegi Qaınar aýylyndaǵy dene shynyqtyrý-saýyqtyrý jobasyn qaıta qarastyrdyq. Óıtkeni ol jerge basseıni bar úlken keshenniń qajeti joq. Ol kóbinese bos turady. Al ony jylytýǵa, tehnıkalyq qyzmet kórsetýge bıýdjet qarjysy shyǵyndalady. Bulaı jasaýǵa bolmaıdy. Kerisinshe biz negizsiz shyǵyndarǵa jol bermeýimiz kerek», - dedi oblys ákimi.

Danıal Ahmetovtyń aıtýynsha, taǵy bir mańyzdy másele – dárigerler men pedagogtardyń jetispeýshiligi.

«Búginde aımaqtyń densaýlyq saqtaý salasynda 233 bos jumys orny bar. Kelesi jylǵa jas mamandar úshin salynatyn turǵyn úı qurylysynyń jobalaryn qazirden bastap daıyndaý qajet», - dedi aımaq basshysy.