ShQO-nyń Besqaraǵaı aýdanynda sý basqan úılerden turǵyndar evakýatsııalandy

BESQARAǴAI. QazAqparat - Shyǵys Qazaqstan oblysynyń Besqaraǵaı aýylynda sý basqan úılerden 7 adam evakýatsııalandy. Bul týraly óńirlik Tótenshe jaǵdaılar departamentinen málim etti, dep habarlaıdy «QazAqparat» HAA.

Erigen qar sýy men jerasty sýlary aýyldyń mańynda ornalasqan kólderge qosylyp jatyr. Oktıabrskaıa, Moldojanov jáne Gogol kóshelerindegi úsh úı sý astynda qalyp otyr, taǵy 59 úıdiń aýlasyna sý kirdi. Kýlıkovskoe kólinen sýdy burý úshin aýyl arasyndaǵy joldan uzyndyǵy 15 metr, tereńdigi 30 sm bolatyn or qazyldy. Munda sý deńgeıi turaqtandy. Alaıda, endi aǵyn sý Qamysh kóline quıyp jatyr.

«Sýdy saǵatyna 500 tekshe metrge deıin sorýǵa qabiletti 2 sorǵysh motor-sorǵy ornatyldy. Jalpy alǵanda 144 myń tekshe metrden astam sý soryldy. Jergilikti atqarýshy organdardan tıegish, KamAz jáne ekskavatorlar jumyldyryldy. Aldyn alý sharalary boıynsha jumystar jalǵasyn taýyp jatyr», - dedi ShQO TJD bastyǵynyń orynbasary Aleksandr Lomygın.

Besqaraǵaıda kolledjde, orta mektep pen balabaqshada, barlyǵy úsh evakýatsııalyq pýnkt ashyldy.