ShQO-nyń Balalardy ońaltý ortalyǵy karantın kezinde qalaı jumys isteýde
ÓSKEMEN. QazAqparat – Óskemen qalasynda karantınge qaramastan Ońaltý ortalyǵyndaǵy balalardy emdeý toqtap qalmaǵan, dep habarlaıdy QazAqparat tilshisi.
Óskemendegi Balalardy ońaltý ortalyǵy epıdemıologııalyq jaǵdaıǵa baılanysty karantınge jabylyp qalǵan bolatyn. Osylaısha sońǵy bir aı boıy balalar ońaltýdan qashyqtan ótýde. Ortalyqta tirek-qımyl apparaty buzylǵan jáne psıhonevrologııalyq patologııasy bar 1,5 jastan 18 jasqa deıingi 150 bala ońaltý jáne áleýmettik beıimdelýden ótedi. Kún saıyn balalarmen defektologtar men logopedter jumys istep, olar fızıoterapııa sessııalaryna qatysýlary qajet. Alaıda ata-analar beınerolıkter boıynsha balalarymen óz betinshe aınalysyp, ortalyq mamandarynan konsýltatsııany beıne-chat arqyly alyp otyrǵanyna bir aıǵa jýyqtaǵan.
ShQO Jumyspen qamtý jáne áleýmettik baǵdarlamalardy úılestirý basqarmasynyń basshysy Jasulan Sársebaev balalarynyń jaǵdaıyna alańdaýshylyq tanytqan ata-analarmen kezdesý ótkizip, olarǵa barlyq mán-jaıdy aıtyp, qashyqtan oqytý karantındik shekteýler jaǵdaıynda jasalǵan májbúrli qadam ári qajetti shara ekenin túsindirdi.
«Mekemeni jabý kezinde mamandar tarapynan úı jaǵdaıynda tapsyrmalardy oryndaýǵa múmkindik beretin– ınternet-resýrstarǵa siltemeler, beınerolıkter, saýsaq gımnastıkasy, beıne-chat boıynsha keńester sııaqty oqytý tapsyrmalary ázirlendi. Barlyq tapsyrmalar balalardyń jeke múmkindikterin eskere otyryp, oqý baǵdarlamalaryna sáıkes jasalǵan. Ár bala ózine qolaıly keste boıynsha aınalysady. Kún saıyn mamandar ata-analarmen keri baılanys ornatyp, tapsyrmalar men jattyǵýlardy oryndaý týraly foto jáne beınematerıaldar jiberedi», - dedi ol.
