ShQO-nyń Abaı aýdanynda jabyq basseın salynyp jatyr
ÓSKEMEN. QazAqparat - Shyǵys Qazaqstannyń Abaı aýdanynda júzý sportyna arnalǵan jabyq basseın paıdalanýǵa berilmek, dep habarlaıdy QazAqparat tilshisi.
Abaı aýdany úshin Qaraýylda jabyq basseınniń boı kóterýi tyń jańalyq bolyp otyr. Óıtkeni, munda qazaq kúresi, boks, toǵyzqumalaq sııaqty sport túrleri jaqsy damyǵanymen, fýtbol, voleıbol sııaqty komandalyq sport túrleri men sýda júzý sporty kenje qalǵan. Osy olqylyqtyń ornyn toltyrý úshin ótken jyly oblyst bıýdjetinen jabyq basseınniń qurylysyna 262,2 mln teńge bólingen bolatyn.
Qurylys nysanynyń merdigeri - «Qurylys» JShS-nyń dırektory Edige Shoraev tamyz aıyna deıin búkil jumys bitetinin aıtady.
«Joba boıynsha júzý basseıni 5 jolaqty bolady. Ǵımaratta 1 kúnde 40 adam jattyǵa alady. Júzý jolaqtarynan bólek jattyǵý zaldary men monsha, ashana, jýynatyn jáne demalatyn bólmeler qarastyrylǵan. Sýdy tazartyp turatyn qurylǵylar jáne sýdyń quramyn tekserip turatyn arnaıy zerthanasy bar. Nysannyń aınalasyna 40 shyrsha egildi. Jobaǵa sáıkes kólik turaǵy, káriz ǵımarattary boı kóterdi. Bul basseın aýdannyń 90 jyldyq toıyna erekshe tartý bolatyn túri bar. Qurylys jumystary bitti deýge bolady. Endi tek qural-jabdyqtardy ornatý ǵana qaldy», - deıdi Edige Shoraev.
