ShQO-nyń 71 eldi mekeniniń 46-da sý basý qaýpi azaıtyldy
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar jergilikti atqarýshy organdarmen birlesip, sý tasqyny qaýpi joǵary ýchaskelerge monıtorıng júrgizýde. Jalpy óńir boıynsha kóktemde sý basý qaýpi basym 71 eldi meken bar. Búginde onyń ishindegi 15 aýylda qaýip joıylyp, 46-da barynsha azaıtyldy.
«Arnaıy jol kartasyna sáıkes, oblysta tasqynǵa qarsy 21 shara josparlanǵan. Búgingi kúni onyń 16-sy iske asyryldy. Aryq arnalaryn tereńdetý jáne tazartý, naýalardy jóndeý, ózen jaǵalaýlaryn nyǵaıtý jumystary jalǵasýda. Oblystyq mańyzy bar avtokólik joldaryndaǵy 102 kópir men 1503 sý ótkizý qubyrlaryndaǵy sý deńgeıi turaqty baqylaýda», - delingen aqparatta.
Kún saıyn joldardaǵy sý ótkizý qubyrlary muzdan tazartylyp jatyr. Jergilikti atqarýshy organdar 62 sý ótkizý qurylysyn, 80 shaqyrym aryq pen kanaldy, 46 kópirdi tazartyp, 102 myń tekshe metr qar shyǵardy.
«Qazgıdromet» RMK usynǵan aqparatqa sáıkes, oblys boıynsha Tarbaǵataı aýdanynyń Aqjar aýylynda topyraqtyń qatý tereńdigi eń joǵary. Naqty aıtqanda – 77 sm qurap otyr.
«Óńirdegi jazyq jerlerdiń basym bóliginde qar jamylǵysyndaǵy sý qory normadan 3 esege asyp tústi. Bul Katonqaraǵaı, Kúrshim Kókpekti, Glýbokoe jáne Shemonaıha aýdandarynda.
Qar jamylǵysynyń bıiktigi 13 sm-den 116 sm-ge deıin jetti. Oblystyń taýly aýmaǵynda qar qalyńdyǵy normaǵa jýyq, shyǵysta jáne ońtústik-shyǵysta normadan 20-25 paıyzǵa joǵary», - delingen habarlamada.
Sý tasqyny qaýpi joǵary kezeńde jedel áreket etý úshin ShQO TJD-nyń jeke quramynan 1764 adam, 217 tasymaldanatyn jáne 18 tirkemeli motopompa, 700-den astam tehnıka, jergilikti atqarýshy organdardan 60 júzý quraly ázirlengen. Tótenshe jaǵdaılar kezinde halyqty evakýatsııalaıtyn 124 pýnkt daıyndaldy.
Foto: ShQO TJD