ShQO-nyń birneshe aýdanynda jaýǵan qar mólsheri normadan áldeqaıda joǵary

ÓSKEMEN. KAZINFORM – Shyǵys Qazaqstan oblysynyń keı aýdandaryna bıyl qar qalyń tústi. 

«Qazgıdromet» RMK ShQO fılıalynyń málimetinshe, oblystyń jazyq aýmaqtarynyń basym bóliginde qar mólsheri normadan 112-146% joǵary.

Meteostantsııalar derekterine sáıkes, qar qorynyń ortasha kópjyldyq kórsetkishten artýy Shemonaıha, Úlken Naryn, Tarbaǵataı jáne Zaısan aýdandarynda erekshe baıqalady.

– Qar jamylǵysynyń bıiktigi Marqakól aýdanynda (Boran aýyly) 8 sm-den Altaı jáne Glýbokoe aýdandarynda 80-90 sm-ge deıin jetedi. Aqpan aıynyń birinshi onkúndiginde jaýyn-shashyn mólsheriniń onkúndik normadan artýy Altaı, Samar, Úlken Naryn, Glýbokoe aýdandarynda, Rıdder jáne Óskemen qalalarynda baıqaldy. Jalpy gıdrologııalyq jaǵdaı turaqty, - delingen aqparatta. 

Ózenderdiń basym bóliginde muz qatqan, dese de keı jerlerde tolyq qatpaǵany baıqalady. Ózenderdegi muz qalyńdyǵy – 18-68 sm. Buqtyrma sý qoımasynda – 30-72 sm aralyǵynda. 

– Aýa raıy boljamyna sáıkes, aqpan men naýryz aılary jyly bolady. Aýanyń ortasha temperatýrasy oblystyń kóp bóliginde klımattyq normadan 1-2° joǵary boljanyp otyr. Naýryz aıynda oblys aýmaǵy boıynsha jaýyn-shashyn mólsheri normadan kóp bolady dep kútiledi, - delingen habarlamada. 

Eske salsaq, osyǵan deıin Kentaý qalasynda jańbyrdan keıin kóshelerdi sý basqany habarlanǵan.