ShQO-nyń 8 aýdanynda sýbsıdııa alǵan sharýagerler mindettemelerin oryndamaǵan
ÓSKEMEN. KAZINFORM — Shyǵys Qazaqstan oblysynyń 8 aýdanynda memleketten sýbsıdııa alǵan sharýagerler mal basyn saqtaý mindettemelerin oryndamaǵany anyqtaldy. Bul týraly oblystyń aýyl sharýashylyǵyn damytý máseleleri jóninde ótken jınalysta aıtyldy.
— ShQO boıynsha Іshki memlekettik aýdıt departamenti Aýyl sharýashylyǵy basqarmasyna memlekettik aýdıt júrgizdi. Sonyń nátıjesi boıynsha basqarma 74 aýyl sharýashylyǵy taýaryn óndirýshige 1 284 bas iri qara malǵa sýbsıdııa bergeni, alaıda olar mal basyn saqtaý mindettemelerin oryndamaǵany anyqtaldy, — dedi ShQO Aýyl sharýashylyǵy basqarmasy basshysynyń orynbasary Jannat Kósherova.
Bul Zaısan, Tarbaǵataı, Ulan, Kúrshim, Samar, Úlken Naryn, Shemonaıha, Marqakól aýdandaryna qatysty.
— Sondyqtan aýdandyq aýyl sharýashylyǵy bólimderi sýbsıdııalanǵan mal basynyń saqtalýyna toqsan saıyn monıtorıng júrgizip otyrýy qajet, — dedi J.Kósherova.
Endi atalǵan aýdan ákimderi malǵa berilgen sýbsıdııalardy qaıtarý jumystaryn júrgizýi tıis.
Eske salsaq, osyǵan deıin Atyraý oblysynda mal urlyǵyna qarsy blokbeketter qoıylǵany habarlanǵan.