ShQO-nyń 3 birdeı aýdanynda alǵash ret AITV juqtyrǵandar tirkeldi

ÓSKEMEN. KAZINFORM – Shyǵys Qazaqstan oblysynda adamnyń ımmýn tapshylyǵy vırýsyn (VICh) juqtyrǵandar buryn-sońdy tirkelmegen aýdandarda aýyrǵandar anyqtalyp otyr. 

Óńir boıynsha osy jyldyń birinshi toqsanynda AITV juqtyrý deregi ótken jyldyń sáıkes kezeńimen salystyrǵanda 27 paıyz azaıǵan. Dese de, 3 birdeı aýdanda alǵash ret naýqastar tirkeldi. Ol – Samar, Zaısan jáne Ulan aýdandary. Bul týraly ShQO JITS aldyn alý jáne oǵan qarsy kúres ortalyǵynyń ókili Araı Aıdarqyzy málim etti.

- Óńirde AITV juqtyrǵandar eń kóp tirkeletin qala, aýdandar - Óskemen, Rıdder qalalary men Altaı, Shemonaıha, Glýbokoe aýdandary. Jas ereksheligine kelsek, juqtyrǵandardyń kóbi 30-49 jas aralyǵyndaǵy adamdar. ıAǵnı, aýyrǵandar jumys isteıtin azamattar arasynda. Er adamdar bul dertke áıelderge qaraǵanda eki ese jıi shaldyǵady, - dedi ol.

Aıta keteıik, Shyǵys Qazaqstan respýblıka deńgeıinde AITV juqtyrǵandar sany boıynsha ekinshi orynda tur. Qazirgi tańda birinshi orynda - Qaraǵandy oblysy.

Mamandardyń aıtýynsha, vırýs negizinen jynystyq qatynas arqyly taraıdy. Bul jalpy juqtyrǵandardyń 75 paıyzy.

Eske salsaq, Qyzylordadaǵy AITV-ınfektsııasyn juqtyrý oqıǵasynan keıin buıryqqa ózgeris engizilgeni habarlanǵan.