ShQO-ny basqarǵan Ermek Kósherbaev nesimen este qaldy
ÓSKEMEN. KAZINFORM – Ermek Kósherbaev Shyǵys Qazaqstan oblysynyń ákimi bolyp 2023 jyldyń 16 maýsymynda taǵaıyndaldy. Osy qyzmette 1 jyl 8 aı ǵana jumys istedi.
Onyń bul ýaqyt ishinde nesimen este qalǵanyn Kazinform tilshisi saraptap kórdi. Ermek Kósherbaev oblysty basqaryp turǵandaǵy eleýli oqıǵalar da eske alyndy.
Ermek Bedelbaıuly 1965 jyly Almaty qalasynda týǵan. Eńbek jolyn 1988 jyly QazSSR Syrtqy ister mınıstrliginiń qupııa is qaǵazdaryn júrgizý boıynsha aǵa ınspektory bolyp bastaǵan. Shyǵys Qazaqstanǵa ákim bolardyń aldynda Qazaqstan Respýblıkasynyń Reseı Federatsııasyndaǵy Tótenshe jáne Ókiletti Elshisi bolyp qyzmet etti. Osylaısha, óz tájirıbesinde alǵash ret oblysqa ákim bolyp taǵaıyndaldy.
Apat aıtyp kelmeıdi
Osy bir jarym jyldan astam ýaqyt ishinde oblysta túrli apattar boldy. Burynǵy ákim Danıal Ahmetov iri apat bolmasa usaǵyna bara bermeıtin. Al Ermek Kósherbaev óńirdiń ár aýdanynda bolyp jatqan túrli apattarǵa ózi jedel baryp otyrdy. Bireýler buny qoldasa, keıbiri quptamaı jatty. Máselen, eń áýeli 2023 jyly qazan aıynda Zaısanda birqabatty qoǵamdyq monshada jylytý qazandyǵy jarylyp, 1 adam qaza bolǵanda ol sol jerge tún jarymynda attanǵan.
2024 jyly 31 tamyzda Glýbokoe aýdanyndaǵy KAZ Minerals kompanııasyna qarasty «Ertis» shahtasynda gazdan ýlanyp qalǵan 4 adam kóz jumǵanda Ermek Kósherbaev marqumdardyń otbasylaryna baryp, kóńil aıtyp, qajetti kómek kórsetti. Byltyr 21 jeltoqsanda tańǵy saǵat 4:39-da Rıdderdegi jylý elektr ortalyǵynda jarylys bolyp, 6 adam zardap shekkende sol jerge taban tirep, jaǵdaıdy baqylaýǵa alǵan.
Basqa oblys turǵyndary «ákim bolǵan soń barýǵa mindetti emes pe?» dep pikir bildirip jatsa, ShQO-ny 9 jyl basqarǵan Danıal Ahmetovten keıin shyǵysqazaqstandyqtarǵa bul da jańalyq bolyp kóringeni ras.
Joldyń «jyry»
2023 jyldyń qarasha aıynda Ortalyq kommýnıkatsııalar qyzmetinde ótken baspasóz máslıhatynda Ermek Kósherbaev 2024 jyl oblysta Jol jyly dep jarııalanǵanyn málimdegen edi. Sebebi óńir halqyn tolǵandyrǵan ózekti máselelerdiń ishinde joldyń jaıy aldyńǵy lekte tur. Shuryq tesik joldardan bir jerden ekinshi jerge jetý muń. Týrısterdiń de sýly da nýly ólkege kóp at izin sala bermeıtini de sondyqtan bolar.
Ákimdik jyldy qorytyndylaǵanda 600 shaqyrym joldyń jóndelgenin málim etti. Dese de el arasynda jolǵa shaǵymdanatyndar áli de tolastamady. Óńir boıynsha áli asfalttyń betin kórmegen 79 aýyl bar. Taý ústindegi ıreleń jol - Osınov asýyn qaıta jańǵyrtý jumysy 8 jyl buryn bastalsa da sol kúıi aıaqtalmaı keledi. Óskemen men Rıdder arasyndaǵy jańa jol qurylysy da sozbalańǵa salynyp ketken.
Kópten kútken kópir
ShQO-nyń jeti aýdany – Kúrshim, Marqakól, Zaısan, Tarbaǵataı, Altaı, Úlken Naryn men Katonqaraǵaı halqy 60 jyl boıy kútken Buqtyrma sý qoımasy arqyly ótetin kópir byltyr qazan aıynda ashyldy. Onyń qurylysy Danıal Ahmetovtyń tusynda Prezıdenttiń pármenimen bastalyp, Ermek Kósherbaev oblysty basqaryp turǵanda aıaqtaldy. Uzyndyǵy 1 316 metrdi quraıtyn kópir táýligine 80 myń avtokólikti ótkize alady.
Ýshyqqan ekologııa máselesi
2024 jyldyń qarasha aıynda Óskemen turǵyndary aýa sapasynyń kúrt nasharlap ketkenine qaıta-qaıta shaǵymdana bastady. Jel soqpaı, qolaısyz meteorologııalyq jaǵdaı qalyptasty. Qalany qoıý tútin tumshalap alyp, aýrýhanaǵa em izdep kelgender sany kúrt kóbeıdi. 28-29 qarasha kúnderi alǵash ret ekologııalyq jaǵdaıǵa baılanysty oqýshylar onlaın formatqa aýystyryldy. Sodan soń tarıhta birinshi ret 4 adamǵa «tamaqtyń hımııalyq kúıigi» dıagnozy qoıyldy.
«Qazgıdromet» RMK júrgizgen monıtorıng nátıjesinde zııandy shyǵaryndylardyń ruqsat etilgen shekten asyp ketý faktisi tirkeldi. Jyl basynan beri óńir ekologtary aýany lastaǵan kásiporyndarǵa 2,2 mlrd teńge aıyppul salǵan. ShQO ákimi Ermek Kósherbaev Óskemende ekologııa jaǵdaıyn jaqsartý úshin arnaıy uıym qurylatyndyǵyn málim etti.
– Keıbir kásiporyndar ár túrli syltaý aıtyp, qolaısyz meteorologııalyq jaǵdaı kúnderi óz ǵımarattaryna qajetti ólsheý jumystaryn júrgizý úshin kirgizbeı jatady. Eger kásiporyndar aradaǵy kelisilgen talaptardy oryndap otyrǵan bolsa, onda ruqsat berer edi. Tekserýden qashsa, demek jasyratyn nárseleri bar, - dedi ol.
2025 jyldyń 10 qańtarynda «Óskemen tynysy» ekologııalyq qorǵaý bıýrosy resmı túrde óz jumysyn bastady. Endi bıýro músheleri ónerkásiptik nysandarǵa tekseris jumystaryna qatystyp, qaladaǵy aýa sapasyn jaqsartý úshin túrli jobalardy qolǵa alyp jatyr.
Ulttyq sport jáne dombyra
Ermek Kósherbaevtyń tusynda Shyǵys Qazaqstanda ulttyq sport qaıta jandana tústi. Buryn múlde kenjelep qaldy deýge kelmes. Dese de osy 1 jyl 8 aıdyń ishinde qazaqtyń kóneden kele jatqan sport túrleri boıynsha túrli dodalar jıirek uıymdastyryldy. Zaısanda halyqtyq sport oıyndary ótse, Ulan aýdanynyń Bozanbaı aýylynda ornalasqan Búrkit tóbe alańynda halyqaralyq «Shyǵys Salbýryny» búrkitshiler festıvali burynǵyǵa qaraǵanda áldeqaıda aýqymdy qylyp ótkizildi. Tipti 20 jyl boıy at dúbirin estimegen Rıdder qalasynda ulttyq sport túrlerinen saıys ótip, halyq qıqýlap, bir serpilip qaldy.
Taǵy bir aıta keterligi, ákim osyndaı ulttyq formattaǵy sharalarda qolyna dombyra alyp, kúmbirletip kúı shertip turatyn.
@ne_habar ShQO ákimi turǵyndardy qoldap, Óskemendegi Qaısenov pen Áýezov kóshelerindegi burylys máselesin sheshti. #shqo #óskemen #vko ♬ orıgınalnyı zvýk - Ne_habar
Bul da jurttyń kóńilin súısintip jatty.
P.S. 1 jyl 8 aı naqty baǵa berý úshin az ýaqyt. Dese de Ermek Kósherbaev shyǵysqazaqstandyqtardyń esinde qalary anyq.
Eske salsaq, Danıal Ahmetov ShQO ákimi laýazymynan bosatylǵanda onyń nesimen este qalǵany jaıly jazǵan bolatynbyz.