ShQO munaı kompanııasynyń Qytaıǵa gaz eksporttaýyna tyıym salynýy múmkin
Aımaq basshysy Danıal Ahmetov «Tarbaǵataı Munaı» kompanııasyna QHR-ǵa gaz eksporttaýǵa tyıym salý máselesi boıynsha jınalys ótkizdi.
«Bul kompanııa Zaısan aýdanynyń ortalyǵy men birneshe kentti kógildir otynmen qamtamasyz etip otyr. 2024 jylǵa deıin taǵy segiz eldi mekendi gazdandyrý qajet. Bul rette qazirgi qory eń kóp degende 12-13 jylǵa jetedi. Kompanııa basshylyǵy aldaǵy ýaqytta úlken shyǵynǵa ushyraıtynyn, olardy Qytaıǵa 75 mıllıon tekshe metr gaz eksporty ǵana qutqaratynyn aıtyp otyr», - dedi oblys ákimi.
Alaıda kásiporyn damý josparyn usynbaı, Zaısan aýdanynyń turǵyndaryn gazben úzdiksiz qamtamasyz etetindigine kepildik bergen joq.
«Kompanııa 2015 jyldan bastap gaz baǵasyn 6 ese kóterdi. Kásiporynnyń menedjmenti kóptegen suraq týdyrady. Premer-Mınıstrdiń birinshi orynbasary Roman Sklıar Energetıka mınıstrligine gaz óndirýshi kompanııanyń búkil sharttary men mindettemelerin qaıta qaraýdy tapsyrǵan», - dedi Danıal Ahmetov.
Onyń aıtýynsha, beıindi mınıstrlik ókilderi men kásiporyn basshylyǵy 11 mamyrda aýdan turǵyndarymen kezdesip, tolǵandyrǵan barlyq suraqtarǵa jaýap berip, Zaısandy gazben úzdiksiz qamtamasyz etý týraly memorandýmǵa qol qoıýy tıis.
Eger talaptar oryndalmasa, «Tarbaǵataı Munaı» kompanııasyna shetelge gaz eksporttaýǵa tyıym salynady.
