ShQO men Abaı oblysynda turǵyndar ashyqqan aıýlardan úreılenip otyr
ÓSKEMEN. KAZINFORM — Shyǵys Qazaqstan men Abaı oblystarynda jaz boıy maı qoryn jınap úlgermegen aıýlar qysta qalyń uıqyǵa ketpeýi múmkin. Sebebi olar qorektenetin aǵashtar, jıdekter, kedr jańǵaqtary az ónim bergen. Budan mańaıdaǵy aýyl jurty zardap shegemiz be dep qaýiptenip otyr.
Shyǵys Qazaqstan turǵyndary kóktemde eldimeken mańaıyn aıý kezip júrgenin aıtyp talaı márte shaǵymdanǵan edi. Ásirese Rıdder, Serebrıansk qalalary, Poperechnoe, Mıhaılovka jáne Glýbokoe aýyldarynyń halqy túz taǵysyn kórgendikterin aıtyp, quzyrly organdarǵa jıi habarlasqan. Sonyń saldarynan olar áli kúnge deıin túnde dalaǵa shyǵýǵa qorqyp otyr.
— Turǵyndardan ár apta saıyn shaǵym túsedi. Janýarlar memleket qaraýynda bolǵandyqtan olardy túgel atyp tastaı almaımyz. Bizdiń ınspektorlar shaǵym túsken jerge baryp, qatty dybys pen jaryqty qoldaný arqyly aıýdy úrkitip, aýyl mańynan alshaqtatýǵa tyrysady, — dedi Orman jáne ańshylyq jedel áreket etý jasaǵynyń ınspektory Vadım Lıtvınenko.
Sondaı-aq ınspektor jıdek pen jańǵaqtardyń jetispeýshiliginen qorek izdegen maımaq ań omartalardaǵy bal qaldyqtarynyń ıisine qaraı bet alatyndyǵyn aıtty. Aýyl mańynda mal soıǵannan qalǵan qaldyqtar da aıýlardyń jaıylymdaǵy malǵa shabýyna sebep bolyp jatady. Serebrıanskidegi balyq tsehinen shyǵatyn ıis te jyrtqysh ańdy ózine tartady.
Dál osyndaı másele Abaı oblysynda da týyndap otyr. Halyq maımaq ańnyń maza bermeıtinin aıtyp shaǵymdandy. Ásirese Jarma aýdanynyń turǵyndarynan aryz-shaǵym kóp túsip jatyr. Buǵan qatysty Kazinform tilshisine aýdan ákiminiń orynbasary Raıym Joldasbekov jaýap berdi.
— Jarma aýdany Qalbataý aýylynda tamyzda bal omartalaryna qońyr aıýdyń shabýyldaǵany týraly birneshe aqparat kelip tústi. Osyǵan qatysty jergilikti atqarýshy organ ókilderi, quqyq qorǵaý organdary, tıisti basqarma basshylary birlesip, memlekettik úlgidegi ańshylyq kýáligi bar jáne qarýdy saqtaý men alyp júrýge ruqsaty bar 28 adamnan quralǵan arnaıy komıssııa qurdy. Bul komıssııa turǵyndardan shaǵym túsken jerge barýǵa ázir otyr. Kóktemde aıý bir iri qarany jaryp tastaǵan. Odan ózge mundaı jaǵdaı tirkelgen joq, — dedi ol.
Jarma aýdandyq polıtsııa bólimi áleýmettik jeliler men messendjerlik chattarda Georgıevka aýylynda eki turǵyndy aıý jep ketti degen jalǵan aqparatqa qatysty pikir bildirdi.
— El arasynda Georgıevka aýylynda aıý erli-zaıyptylarǵa shabýyl jasady degen aqparat taraǵan. Bul oqıǵa Reseıdegi Georgıevka aýdanynda bolǵan. Jarma aýdany Qalbataý aýylynyń burynǵy ataýymen shatasqan turǵyndar dúrligip ketti. Osy oraıda, polıtsııa bólimi turǵyndardy shyndyqqa janaspaıtyn aqparat taratpaýǵa shaqyrady. Eger jalǵan málimet buqaralyq aqparat quraldarynda nemese onlaın-platformalarda taratylsa 3000 AEK (11 mln teńgege jýyq) aıyppul nemese úsh jylǵa deıin bas bostandyǵyn shekteý ne aıyrý jazasy qarastyrylǵan, — delingen aqparatta.
Eske sala ketsek, buǵan deıin SQO-da esh jerde esepte joq 9 myń ga orman alqaby anyqtalǵany týraly jazǵan edik.