2030 jylǵy qysqy Olımpıadanyń jarys baǵdarlamasy bekitildi
ASTANA. KAZINFORM — Halyqaralyq Olımpıadalyq komıtetiniń (HOK) Atqarýshy komıteti Frantsııa Alpilerinde ótetin 2030 jylǵy qysqy Olımpıada oıyndarynyń sport túrleri men jarys baǵdarlamasyn bekitti, dep habarlaıdy UOK baspasóz qyzmeti.
Baǵdarlamaǵa shańǵy sporty men snoýbordtaǵy frıraıd, sondaı-aq, sınhrondy mánerlep syrǵanaý sekildi jańa jarys túrleri engizildi.
Al shańǵy qossaıysy aldaǵy qysqy Olımpıada oıyndarynyń baǵdarlamasyna enbeı qaldy. Mundaı sheshim sport túriniń tanymaldyǵy, kórermen qyzyǵýshylyǵy, medıada qamtylýy jáne álemde taralý deńgeıi jan-jaqty saralanǵannan keıin qabyldandy.
Jalpy, HOK Atqarýshy komıteti úsh jańa sporttyq baǵyt pen 16 jańa júlde jıyntyǵyn qosýdy maquldady. Ózgerister bıatlonǵa, konkımen júgirý sportyna, shańǵy sporttaryna, snoýbordqa jáne skı-alpınızmge qatysty engizildi.
Jańa jarystar qataryna bıatlonnan aralas jekeleı estafeta, konkımen júgirý sportynan erler men áıelder arasyndaǵy komandalyq sprınt, frıstaıldaǵy aralas komandalyq skı-kross, snoýbordtaǵy paralleldi aralas komandalyq jarys, shańǵymen tuǵyrdan sekirýden áıelder arasyndaǵy komandalyq jarys, sondaı-aq, shańǵy sporty men snoýbordtaǵy frıraıd jáne sınhrondy mánerlep syrǵanaý engizildi.
Buǵan deıin Olımpıada baǵdarlamasyna qosymsha sport túri retinde bekitilgen skı-alpınızmde erler men áıelder arasyndaǵy jekeleı jarystar, erler men áıelder arasyndaǵy sprınt jáne aralas estafeta ótedi. Sonymen qatar HOK Atqarýshy komıteti snoýbordtaǵy parallel slalom-gıgant jarysynyń Olımpıada baǵdarlamasynda saqtalatynyn rastady.
2030 jylǵy Frantsııa Alpilerindegi qysqy Olımpıada oıyndary tarıhta alǵash ret sportshylarǵa bólinetin kvota sany boıynsha genderlik teńdik qamtamasyz etiletin qysqy Olımpıada bolmaq. Jalpy sany 3046 sportshy qatysady: 1525 áıel jáne 1521 er adam. Baǵdarlamada 126 júlde jıyntyǵy sarapqa salynady: 56-sy áıelder arasynda, 55-i erler arasynda jáne 15-i aralas jarystarda.
HOK málimetinshe, shańǵy qossaıysy tanymaldyǵy men álemde taralý deńgeıi jaǵynan ózge sport túrlerinen áli de artta qalyp otyr. Sońǵy tórt qysqy Olımpıada oıynynda bul sport túrinen júlde alǵandar nebári bes ulttyq olımpıadalyq komıtettiń ókilderi boldy. Soǵan qaramastan, shańǵy qossaıysy 2028 jyly IV qysqy Jasóspirimder Olımpıada oıyndary aıasynda Dolomıtter men Valtellına óńirlerinde ótetin jarystar baǵdarlamasynda qalady jáne 2034 jyly Solt-Leık-Sıtı qalasynda ótetin XXVIII qysqy Olımpıada oıyndarynyń baǵdarlamasyna qaıta enýge úmitker bola alady.
Budan bólek, HOK Atqarýshy komıteti sport nysandarynyń jańartylǵan basty josparyn da maquldady. Skı-alpınızm jarystary Monjenevrde ótedi. Bul qoldanystaǵy sporttyq ınfraqurylym men Brıansondaǵy Olımpıada qalashyǵyn tıimdi paıdalanýǵa múmkindik beredi. Sondaı-aq Paralımpıada oıyndary ótetin sport nysandarynyń josparyna Olımpıada murasyn tıimdi paıdalanýǵa múmkindik beretin ózgerister engizildi.
Budan buryn Aleksandr Vınokýrovtyń kıimi Lozannadaǵy Halyqaralyq Olımpıada murajaıyna syıǵa berilgenin jazdyq.
