ShQO memqyzmetkerleri jańa jyldy toılaýdan bas tartyp, balalar men qarttarǵa syı taratty

ASTANA. QazAqparat - Korporatıvtiń ornyna qaıyrymdylyq! Osy qaǵıdatty ustanǵan Shyǵys Qazaqstan oblystyq qurylys basqarmasynyń qyzmetkerleri jańa jyldyq keshtiń ornyna balalar jáne qarttar úılerine syı taratyp júr, dep habarlaıdy QazAqparat tilshisi.

Oblys ákiminiń baspasóz qyzmetinen habarlaǵandaı, shyǵystyń memlekettik qyzmetkerleri Óskemen qalasynyń birneshe áleýmettik mekemesine merekelik kóńil-kúı syılap, az qamtylǵan otbasylarǵa syılyq taratqan.

Memlekettik qyzmetkerler jınalǵan aqshaǵa Analar úıi men mamandandyrylǵan balalar úıine oıynshyqtar men kitaptar, tátti-dámdiler tartty. Osylaısha, ınternat úıi men qarttar úıiniń, múgedekter mekemesiniń adamdaryna júrýdi úıretetin arbalar, tonometrler, arnaıy ústelder tabys etilgen.

«Bizge tartý etilgen syılyqtarǵa kóńilimiz kóterilip qaldy. Eń bastysy, barlyǵy - eń qajetti dúnıeler», - dep áserimen bólisedi soǵys ardageri, Shyǵys Qazaqstan oblysyndaǵy qarttar men múgedekterge arnalǵan ınternat-úıiniń qamqorlyǵyndaǵy Pavel Nagovskıı.

ShQO qurylys, sáýlet jáne qala qurylysy basqarmasynyń basshysy Baýyrjan Qudııarovtyń aıtýynsha, bul jańa jylda ujym bolyp barlyǵy merekelik korporatıv keshinen bas tartqan.  

«Mundaı aktsııa biz úshin izgi dástúrge aınalady. Eń aldymen, biz balalarǵa, aqsaqaldar men analarǵa qýanysh syılaı alǵan sekildimiz. Bul meıramda bári bir jerden syılyq keletindeı kútip júredi ǵoı. Osy syıdy bere bilgenimizge qýanyshtymyz», - deıdi Baýyrjan Qudııarov.

Aıta keterligi, vedomstvo ujymy bul sheshimdi óz betinshe qabyldaǵan.