ShQO mektepterinde órt qaýipsizdigi talaptaryn buzýdyń 2400-ge jýyq faktisi tirkeldi
ÓSKEMEN. KAZINFORM – Shyǵys Qazaqstan oblysyndaǵy mektepterde órt qaýipsizdigi talaptaryn buzýdyń 2392 faktisi tirkeldi.
Oqý jylynyń bastalýy qarsańynda ShQO Tótenshe jaǵdaılar departamenti memlekettik órt baqylaý basqarmasynyń mamandary 671 bilim ordasynyń 362-sine tekserý júrgizdi. Sonyń barysynda órt qaýipsizdigi talaptaryn buzýdyń 2392 faktisi anyqtalǵan.
Memlekettik órt baqylaý basqarmasy bastyǵynyń orynbasary Medet Muqashevtiń aıtýynsha, zańbuzýshylyqtardyń arasynda avtomatty órt dabyly júıesiniń jaramsyz bolýy, bastapqy órt sóndirý quraldarynyń tolyq jınaqtalmaýy, órtke qarsy sýmen jabdyqtaý kózderiniń bolmaýy nemese qolda bar júıelerdiń jumys istemeýi jıi kezdesedi.
Sondaı-aq evakýatsııalyq shyǵý joldaryn paıdalaný kezinde de talaptardyń saqtalmaǵany belgili boldy. Atap aıtqanda, evakýatsııa joldarynyń zattarmen bógelýi, talapqa saı emes árleý materıaldarynyń qoldanylýy jáne basqa da buzýshylyqtar tirkelgen.
– Nysandardyń basshylaryna tekserý nátıjeleri boıynsha aktiler men anyqtalǵan buzýshylyqtardy joıý merzimderi kórsetilgen nusqamalar berildi. Sonymen qatar 286 bilim ordasyna qatysty jedel den qoıý sharalary qoldanyldy, – dedi Medet Muqashev.
QR Ákimshilik quqyq buzýshylyq týraly Kodeksiniń 462-baby 3-bóligi boıynsha 29 ákimshilik is sot organdaryna joldandy.
Eske salsaq, osyǵan deıin 2 myńnan astam mektep ashanasynda sanıtarııalyq talap buzylǵany habarlanǵan.
